Sadrıaʿzam-ı sütûde-şiyem hazretlerinin her tavr-ı Vezîrâne'leri muvâfık-ı mizâc-ı hümâyûn ve her mâdde-i muhtelifetü'ş-şuʿûnda hayyiz-resân-ı vukūʿ olan re'y ü tedbîr-i rezînleri tâb-dâde-i devlet-i rûz-efzûnları olduğuna binâ'en, kemâl-i istiklâl [Ü4 315a] ve sümüvv-i menziletlerini zâhir-bînân-ı ʿavâmma işâʿa vü iʿlân ve hakk-ı müstehakk-ı Âsafâne'lerinde muzmer olan hüsn-i teveccühât-ı Cihân-bânî'lerini ifşâ vü beyân siyâkında işbu Şevvâlü'l-mükerrem'in on dördüncü Salı günü Dîvân-ı âlî'de icrây-ı ahkâm ve fasl-ı miyâne-i hısâm ederler iken, Kahveci-başı Mehmed Emîn Ağa vesâtatiyle bir sevb-i veşak kürke mashûb hatt-ı hümâyûn-ı mevâhib-makrûnları şeref-rîz-i vürûd ve Sadr-ı müşârun ileyh hazretleri tarafından bu ʿârife-i iltifât-endûd hutuvât-ı tebcîl ile istikbâl ve mâlîde-i nâsıye-i ibtihâl kılınup, ferve-i mezkûreyi tevkīr-ı bî-intihâ ile iktisâ ve hatt-ı hümâyûnu ʿalâ-mele'i'n-nâs kırâ'at etdirdikden sonra, duʿây-ı bekāy-ı ʿömr ü şevket-i Şâhâne'yi îsâl-i mesâmiʿ-i mele'-i aʿlâ buyurup, resânende-i hatt-ı hümâyûn olan Kahveci-başı Ağa'ya bir sevb-i ferve-i semmûr iksâ ve bir re's esb-i müzeyyen ve on beş kîse nakd iʿtâ buyurdular.