Haleb Vâlîsi Vezîr Mehmed Paşa'nın ehâlî ile [Ü4 314b] vâkiʿ olan ser-güzeşti mukaddemâ beyân olunup, tasavvurât-ı zihniyye ve tasarrufât-ı ʿakliyye ile Haleb'e idhâl olunduysa dahi, beyne'l-ehâlî mahsûr ve etbâʿ u levâhıkı esliha ve esbâb-ı mümânaʿadan ʿârî vü mücerred olarak eyâdî-yi sefele-i memleketde makhûr olup, nizâm-ı beldeye şurûʿ-ı tekellüfe muhtâc ve belki ifnây-ı nüfûs ve izâʿat-ı emvâl intâc edeceği mebâdî ve mekāsıd-ı mâddeden istinbât u istihrâc olunduğundan başka, müşârun ileyh dahi bir takrîb Haleb'den kurtulmak fikrinde olduğunu îmâ ve ʿazl olunsa şâyed ehâlî sebîlini tahliye etmamek ve etdikleri takdîrde şân-ı Vezâret'e îrâs-ı halel eyleyecek baʿzı harekât-ı nâ-bercâ izhâr etmek vârid-i hâtır-ı uli'n-nühâ olmağla, şimdilik müşârun ileyhe Haleb Eyâleti ibkā vü takrîr ve Cerde Başbûğluğu'yla Trablus Eyâleti zamîme kılınup, Haleb'i Mütesellim nasbı ile zabt etmek irâdesi tarafına tahrîr olunup, Trablus'a vardıkdan sonra, ʿuhdesinden [V 167a] Haleb Eyâleti fekk, tasmîm-kerde-i veliyy-i umûr ve pederi o vakitler cânib-i Hicâz'a ʿazîmet etmiş bulunup, Haleb Eyâleti'nin oğlundan refʿi müşârun ileyhe mûcib-i zevâl-i nüfûz u iʿtibâr olmayacağı zebân-âver-i erbâb-ı ʿakl u şuʿûr oldu.