Ricâl-i devletde kesret ve menâsıbda kıllet olduğuna binâ'en, müntefaʿun-bih baʿzı mansıbın terfîʿi ile ehl-i rüteb ve ekâbiri ırzâ ve kalîlü'l-îrâd olan menâsıb-ı celîleye tasarrufât-ı ʿakliyye ile îrâs-1 vefr ü nemâ lâzım geldiğinden, Defter Emâneti îrâdı teksîr olunarak fi'le çıkup, Nişancılık vâridâtı dahi teksîr olunmak menvî-yi zamîr olduğundan başka, nev-be-nev izâfeten ve ʿilâveten [V 165b] tekessür eden eshâm harcı dahi şahs-ı vâhide münhasır ve sûretlerinden vâfir mebâliğ husûlü zâhir olup, mütevessitât-ı menâsıbdan ʿadd olunarak zevât- ı müteşahhısadan birine her sâl tevcîhi münâsib görülmekle, rütbeleri terfîʿ olunan menâsıb ve müceddeden îcâd olunan Sehim Mukātaʿacılığı ʿalâ-vechi't-tertîb nakş-ı sahâyif-i vekāyiʿ kılınmak tasvîb olundu. Binâ'en-ʿalâ-zâlik işbu Şevvâlü'l-mükerremin dördüncü Sebt günü giceden med'uvv olan ashâb-ı merâtib ve ashâb-ı menâsıb Bâb-ı ʿâlî'de cem' olup, vakt-i muhtâr hulûlünde Kapudân-ı deryâ Vezîr İsmâʿîl Paşa'ya ibkā hilʿati iksâ ve ricâl-i Bâb takrîr-i hıdemât-ı mahsûsalarıyla kayd-ı evhâm u endîşeden [Ü4 313a] ihlâ olunup, fekat Çavuşbaşılık, sâbıkā Sadrıaʿzam Kethudâsı Atıf Ahmed Efendi'ye ve Kethudâ Bey Kitâbeti, sâbıkā Atlu Mukābelecisi Hamîd Efendi'ye tevcîh olundu. Şıkk-ı Evvel Defterdarlığı, Mutasarrıfı Seyyid Feyzullah Efendi'ye ve Şıkk-ı Sânî Defterdâlığı, el-Hâc İbrâhîm Efendi'ye ve Şıkk-ı Sâlis Defterdârlığı ve Umûr-ı Bahriyye Nezâreti, es-Seyyid ʿAli Efendi'ye ve Şıkk-ı Râbiʿ Defterdarlığı, Hubûbât Nâzırı Ahmed Efendi'ye ibkā olundu. Nişancılık câh-ı refîʿi mukaddemâ 'Akkâ'ya me'mûr olan Şâmî Râgıb Efendi'ye tevcîh olunup, nezʿ u istihlâsı bâʿis-i fütûr-ı şevk u himmeti olur mülâhazasıyla ibkāsı istisvâb ve Defter Emâneti'ne sâbıkā Çavuş-başı olan Sa'dullah Efendi intihâb olundu. Rûznâmçe-i Evvel mansıbı ile Feyzî Bey-zâde Mehmed Bey tatrîb ve Baş-muhasebe, Cidde Vâlîsi'ne îsâl-i hazîneye me'mûr Eginli Mustafa Efendi'ye eğerçi muvakkaten tevcîh ile muntazır-ı eyyâm-ı tevcîhât olan ekâbir-i devlet-i muhtelicü's-sudûr olmuşlar idi. Ancak mûmâ ileyh bu tarafdan hareket eyledikde, küllî harc-ı râh ile insırâf ve mansıb-ı mezkûra tasarrufu mahz-ı isrâf kabîlinden olduğu hâtır-güzâr-ı Sadr-ı Âsaf-evsâf olmağla, câh-ı mezkûr ile Defterdâr-ı sâbık Hasan Tahsîn Efendi tatyîb olunup, Haremeyn Muhasebeciliği, es-Seyyid Mehmed Efendi'ye tevcîh ve Cizye Muhasebeciliği ile ʿAzmî Ahmed Efendi terfîh olunup, Emânet-i Şehr ve Darb-hâne ve Matbah ibkā ve Arpa Emâneti ile sâbıkā Büyük Tezkireci Ahmed Bey ırzâ olunup, Barut-hâneler Nezâreti, [Ü4 313b] kemâ-fi'l-evvel [V 166a] Râgıb Efendi'ye muhavvel ve Anadolu Muhasebeciliği ile sâbıkā Çavuş-başı Mehmed ʿÂrif Efendi dest-nevâzende-i sadr-ı ecell olup, Masraf-ı Şehriyârî Kitâbeti ʿAzîz Efendi'ye tefvîz ve Süvârî Mukābeleciliği ile Sâlih Paşa-zâde Hüseyin Bey'in edhem-i ikbâli tervîz olundu. Eshâm Mukātaʿacılığı, sâbıkā Defter Emîni Hasan Efendi'ye ihsân ve Yeniçeri Kitâbeti ile ʿOsmân Efendi ferhân kılınup, Sipâh Kitâbeti ile sâbıkā Kethudâ Kâtibi es-Seyyid İbrâhîm Efendi'nin hâtır-ı meksûru mecbûr ve Silâhdâr Kitâbeti ile leyl ü nehâr serâyir-i devlet tahrîriyle ifrâğ-ı cehd ü iktidâr eden Âmedî-yi Re'îsülküttâb ʿİzzet Beyefendi mesrûr oldu. Mevkūfât mansıbı ile Dervîş Paşa kayını Tâhir Efendi dil-şâd ve Mâliyye Tezkireciliği ile Masraf-ı sâbık ʿAli Reşîd Efendi nâyil-i ehass-ı murâd ve Kalyonlar Mevâcibi Kitâbeti tevcîhâtdan mukaddem müceddeden tevcîh olunan Kadrî Efendi'ye ibkā ve Küçük Rûznâme ile Binâ Emîni Hüseyin Efendi mazhar-ı hüsn-i cezâ olup, Piyâde Mukābeleciliği ile Nûrî Efendi'nin mühr-i rifʿatı rahşende vü berîk ve Küçük Evkāf Muhâsebeciliği ile ʿAlâ'eddîn Paşa Kapu Kethudâsı el-Hâc ʿÖmer Efendi tashîh-i tarîk eyledi. Haremeyn Mukātaʿacılığı ile Hazîne'den muhrec Mahmûd Nedîm Efendi kesb-i neşât ve Cebeciler Kitâbeti ile Bekir Paşa-zâde Saʿdullah Bey tahsîl-i mâye-i şevk u inbisât eyleyüp, sâyir ocağlar kitâbeti kemâ-kân mutasarrıflarına ihâle ve menâsıb-ı bâkıyyeye erbâb-ı istihkāk u ehliyyet inâle olunduğundan [Ü4 314a] gayri, bu hân-ı niʿamâdan hisse-yâb olamayan hâcegân, nukūd-ı firâvân ile memnûn ve duʿây-ı Şâhâne'yi resîde-i küngüre-i çarh-ı nîl-gûn eylediler. Dergâh-ı âlî Yeniçeri Ağası ve rikâb ağaları bi-ecmaʿihim ibkā ile rehîn-i istibşâr u ihtizâz ve Baş-bâkī Kulluğu'yla Şehsüvâr-zâde Hamdullah Bey iʿzâz ve Cizye Baş-bâkī Kulluğu Yeğen İbrâhîm Ağa'ya irfâz olunup, Sipâh Ağalığı ile Yahyâ Paşa-zâde [V 166b] ʿAli Bey ser-germ-i silâf-ı sâff-ferhat ve Silâhdâr Ağalığı'yla Monlaş-zâde Mehmed Bey manzûr-ı lihâza-i şefekat oldu. Yevm-i mezkûrda vüzerây-ı ʿizâm tevcîhâtı vâkiʿ olup, Bosna Eyâleti ile sâbıkā Selânik Mutasarrıfı Vezîr es-Seyyid Mustafa Paşa kesb-i sürûr-ı bî-pâyân ve selefi Vezîr Ebûbekir Paşa, Selânik Sancağı'yla tebdîl-i mekân ve Anadolu Eyâleti'yle sâbıkā Sivas Vâlîsi Vezîr Yûsuf Paşa minnet-dâr ve selefi Vezîr Seyyid ʿAbdurrahmân Paşa, Karahisâr Sancağı'na pây-endâz-ı inhidâr ve Silistre Eyâleti'nin tevcîh emri Hanya Muhâfızı Vezîr ʿOsmân Paşa'ya baʿs ü tesrîb ve mutasarrıf olduğu [1] Diyarbekir, sâbıkā Belgrad Muhâfızı Vezîr Hasan Paşa'ya ilhâk olundukda, Resmo Sancağı tevcîh olunan Vezîr Husrev Paşa'ya Hanya Muhâfazası tasvîb ve Sivas Eyâleti, Hotin muhâfazasında Vezîr Mehmed Paşa'ya ber-vech-i ilhâk ihsân ve sâyir eyâlât, mutasarrıflarına ibkā ile her biri müstağrak-ı bahr-i lutf-i bî-pâyân-ı Şehriyâr-ı cihân oldu.