Şeyhulislâm-ı esbak ʿÂşir Efendi vefât etdikde, ʿuhdesinde olan Tırnova ve Bayındır arpalıklarına baʿzı sudûr-ı kirâm Şeyhulislâm-ı vakt sânehullâhu ʿani'l-makt hazretlerini tergīb ve mutasarrıf oldukları arpalıklar âhara verilüp, ile'n-nihâye silsile [V 163b] olarak birkaç âdem tatyîb olunacağını şifâhen ifâdeleri re'y-i rezînlerine tevâfuk edüp, kendi arpalıklarını sâbıkā Sadr-ı Rûm ʿİsmet Beyefendi'ye ve mîr-i müşârun ileyhin arpalıklarını âhara tevcîh ile ʿulemây-ı ʿizâmın baʿzısını terfîh buyurdukları hılâlde, Rumeli Pâyesi olan ʿİzzet Beyefendi'nin arpalığı mahsûlü üç bin guruşa mütekārib iken, ber-vech-i ilhâk Bayındır'a tâlib ve haberleri müteʿâkıb oldukda, sâyirlere nisbetle müşârun ileyhin arpalığı nemâdâr olmak cihetiyle hakkında istiksâr ve nizâm verilan sûret kavl-i leyyin ile tarafına işʿâr olundukda, mahrûr-ı tâbiş-i infiʿâl ve bâʿis-i renciş-i cenâb-ı Fetvâ-penâhî olur baʿzı kelimât-ı nâ-ber-câyı medâr-ı makāl eylediğinden başka, resmen iftârlarına ʿadem-i icâbet ile izhâr-ı gayz u nefret etmişidi. Şeyhulislâm-ı [Ü4 312a] sellemehü's-selâm hazretleri ʿan-asl hüsn-i ahlâk ile muttasıf ve evzâʿ-ı nâsdan tegāfül ile kemâl-i sabr u tehammülüne ʿâlem muʿterif iken, [mısra]: Velâkin yefîzu'l-ke’sü ʿinde'mtilâ'ihâ mefhûmu üzere ʿİzzet Bey'in bu vazʿ-ı garîbi muhill-i hürmet-i mesned ʿadd olunduğuna binâ'en, bir nevʿ cezâ ile rağme-enf tasavvurunu buyurmuşlar idi. Leyletü'l-ʿîd muʿtâd olduğu vech üzere sudûr-ı kirâmı dânişmendler mîr-i müşârun ileyhin zîr u bâlâsından tahsîs bi'z-zikr ile refʿ edüp, bi'l-münâvebe mahall-i mahsûslarına daʿvet ve her birini ʿale'l-infirâd istifsâr-ı hâtır u nevâzişle memnûn-ı rağbet [V 164a] buyurup, mîr-i müşârun ileyhi bu iltifâtdan mehcûr ve ebnây-ı cinsi hakkında cereyân eden lutf u ʿârifeden hirmân ile beyne'l-kavm zelîl ü makhûr eyleyerek, vazʿ-ı nâ-hemvârına mükâfât ve icrây-ı şîve-i terhîbât eyledi. Makām-ı ʿulyây-ı Meşîhat ile mültefit ü ser-efrâz ve Riyâset-i ʿulemâ ile mesned-nişîn-i çâr-suffe-i tehayyüz ü imtiyâz olan zevât-ı ʿizâmın kadr ü şânlarına hürmet ve mesned-i bülendlerine terettüb eden ednâ nakīsadan hifz u vikāyet, de'b-i dîrîn-i devlet ve belki mehaccetü'l-beydâ’-i dîn ve şerʿ-i mutahhar-ı hazret-i Seyyidü'l-mürselîn'e bir nevʿ hidmet kabîlinden olduğu hasebiyle, mîr-i mûmâ ileyhden ser-zede-i zuhûr olan tavr-ı tehevvür ü gurûr şâyed sâmiʿa-güzâr-ı Şehriyâr-ı kâmilü'ş-şuʿûr olup, hakkında tevlîd-i gazy u nefret eder ihtimâlâtı baʿzı hayr [Ü4 312b] -hâhân-ı devlet tarafından mîr-i mûmâ ileyhe nâzikâne işrâb ile hakkında imhâz-ı pend ü nasîhat kılınup, bu kelâm-ı maʿkūl dehlîz-i sâmiʿasına duhûl edüp, fi'l-hâl ziyâret-i cenâb-ı Fetvâ-penâhî'ye dâmen-çîn-i ʿazm ü şitâb ve vazʿ-ı sâbıkından izhâr-ı istihyây-ı zımnî ve istiʿfây-ı maʿnevî ile bâdire-i muhayyileden vâreste vü reh-yâb oldu.