Mâh-ı sıyâm, rehîn-i hayyiz-i hıtâm olduğuna binâ'en, leyletü'l-ʿîd olan Çehârşenbih gicesi [Ü4 311a] Sadrıaʿzam-ı vâlâ-makām ve Şeyhülislâm ve Kapudan Paşa hazerâtı ve sudûr-ı kirâm ve sâyir ʿulemây-ı ʿizâm ve ricâl-i devlet ve Ocağlu ʿale'l-ʿumûm Serây-ı hümâyûn'da cemʿ olup, infilâk-ı subh-ı sâdıkda, nazm: Pâdişâh-ı cihân Sikender-nâm / Dîn ü İslâm ez-û girift-nizâm / Husrev ü husrevân ki, çarh ez-bîm / Der-hatt-ı û nehd-i ser-i teslîm mefhûmuna mâ-sadak olan Şehriyâr-ı mekârim-kâr dâme mâ-dâre'l-felekü'd-devvâr [V 165a] hazretleri mânend-i Hûrşîd-i tâb-dâr, burc-ı saʿâdetden bedîdâr olup, taʿne-zen-i dîhîm-i Keykâvûs olan taht-ı şevket-i meʼnûslarına şeref-endâz-ı kuʿûd ve kānûn üzere Nakībül-eşrâf devâm-ı evân-ı devlet ve bekā-yı ahyân-ı Saltanat'ları duʿâsını dü-dest-i ibtihâl ile berdâşte-i dergâh-ı cenâb-ı Maʿbûd etdiği hılâlde, Sadr-ı sütûde-sîret, gubâr-ı pây-ı iksîr-sâllerin sûde-i cebîn-i rıkkıyyet edüp, ʿale't-teʿâkub Kapudân-ı deryâ ve sadreyn-ı muhteremeyn ve ricâl-i devlet ve sâyir erkân-ı Saltanat vâhiden-baʿde-vâhidin dâmen-bûs-i hümâyûn ile süllem-i şeref ü iftihâra mütesâ'id olup, resm-i tehniyet resîde-i mevkiʿ-i gāyet oldukda, aʿyâda mahsûs âlây-ı dilârâ ve debdebe-i bî-hemtâ ile tevsen-süvâr-ı şevket ü ikbâl ve Sultân Ahmed Câmiʿ-i şerîfinde salât-ı ʿîdi baʿde'l-edâ Serây-ı ʿâmire'lerini matrah-ı eşʿia-i rifʿat ü iclâl eylediler. Nazm Ey Şeh-i cemm-i ʿazamet, hazret-i Mevlây-ı mecîd / Leyletü'l-Kadr ede her şebini, rûzunu ʿîd / Dâyimâ ola mülâzım dergehine zevk u safâ / Gerd-i gamm tabʿ-ı [Ü4 311b] şerîfinden ola dûr u baʿîd / Tâ ebed fer veresin Saltanat-ı ʿuzmâya / Nûh-veş ʿömr-i girân-mâyeni Hakk ede medîd / Eyleye devletin aʿdâsını makhûr Hudâ / Hedef-i tîr-i ʿadüvv-sûzun ola hasm-ı ʿanîd Pîş-vây-ı ʿalem-i devletin olsun tevfîk / Tabʿ-ı nakkādına münkād ola reʾy-i sedîd / Vâsıfın vakʿa-nüvîs-i siyer-i Saltanat'ın / Ede Şehnâme'ni bu tarz ile dâyim tecdîd