Müşârun ileyh kable'l-Vezâre Kapudan olduğu kalyonları lâyıkı üzere idâre ve Korfa ve sâyir mahallerde sebât u metâneti meşhûd ve bu sebeble hakkında târ-ı enzâr-ı rağbet ü iʿtibâr memdûd olmuşidi. Hükm-i Kādir-i lem-yezel ile Kapudanlık münhall oldukda, deryâya Kapudan ve Rütbe-i Vezâret'le refîʿü'ş-şân olup, o esnâda ʿAkkâ'ya taʿyîn ve usûl-i me'mûriyyeti mû-be-mû tarafına tebyîn olunup, o mahalle vürûdunda devlete nâfiʿ ü müfîd tarafından bir hıdmet-i pesendîde zâhir [Ü4 310b] u bedîd olmayup, sevk-ı etbâʿ u havâşî ve iğfâl-ı erbâb-ı hırs u tamaʿdan nâşî, ʿAkkâ'da mahsûr firârî İsmâʿîl Paşa'yı iltizâm ve bedel-i kalîl ve ʿivaz-ı zelîl ile Saydâ tevcîhini müşârun ileyhe iʿlâm edüp, bu keyfiyyet muhâlif-i rızây-ı devlet olduğundan, hakkında tevlîd-i nefret ve îcâb-ı nekbet eylediğinden başka, fî-haddi zâtihî aʿbâ'-i Vezâret'e gayr-i mütehammil ve ʿazli mecârî-yi ahvâline nazaran rütbe-i vücûba mütevâsıl olmağla, Donanma-yı hümâyûn'u rabt-ı mersây-ı Tersâne-i ʿâmire etdiği zemân -ki evâhır-ı Şaʿbân idi- ʿazl ve Vezâret'i refʿ olunup, ʿAkkâ'da ihtilâs eylediği nukūd, cânib-i mîrîye istirdâd ve hıdemât-ı sâbıkası yâd olunarak, kusûr-ı [V 164b] emvâl ü eşyâsı inʿâm u irfâd olunup, ber-vech-i tekāʿüd Burusa'da ikāmeti bâbında irâde-i hazret-i Cihânbânî cereyân ve merfûʿu'l-Vezâre olanlara cânib-i mîrîden ihsân olunan maʿâş ile kesb-i emniyyet ü itmi'nân eyledi. Bir müddetden berü Bostancı-başı olan İsmâʿîl Ağa'nın ʿakl ü dirâyeti müstağnî-yi hadd-i taʿrîf ve tavr u hareketi mergūb-ı vazîʿ u şerîf olup, müteferriʿât-ı hıdmetinden olan hıfz-ı rûy-ı deryâ vü sevâhil ve zabt-ı eşkıyâ vü erâzil mesâlihinde irtikâb-ı tüvânî vü kusûr ve ihtiyâr-ı ʿacz ü fütûr etmeyüp, leyl ü nehâr geşt ü güzâr ile terk-i âsâyiş ü râhat ve bu vesîle ile tahsîl-i rızây-ı Şehriyâr-ı İskender-heybet eyleyüp, Kapudanlık rütbe-i celîlesine her hâlde şâyân ve bu hıdmet-i hatîrede dahi fazl-ı Müsteʿân ile ibrâz-ı mesâʿî-yi meşkûre eyleyeceği muntazır-ı erbâb-ı hads ü izʿân olduğuna binâ'en, devr rikâbı günü Enderûn-ı hümâyûn'da hilʿat-ı zer-beft-i Vezâret'le dûş-ı istîhâli tezyîn ve Deryâ Kapudanlığı'yla mısraʿ-ı berceste-i iʿtibârı tazmîn olundu.