Müşârun ileyh subbet şeʼâbîbü rahmeti'r-Rahmâni ʿaleyh devr-i Mahmûd Hânî'de iki defʿa Re'îsülküttâb ve ʿilm ü kemâlde fâyik-ı etrâb olan el-Hâc Mustafa Efendi merhûmun sulbünden bin yüz kırk iki târîhinde, nazm: Nûrun tevellede min-şemsin ve min-kamer Hattâ tekâmele fîhi'r-rûhu ve'l-beden mefhûmu üzere kımât-ârây-ı mehd-i vücûd ve destyârî-yi feyz-ı [Ü4 306b] nâ-mütenâhî-yi cenâb-ı Maʿbûd ile giderek fârık-ı miyân-ı maʿdûm u mevcûd olup, ber-muktezây-ı kābiliyyet-i mâder-zâd yüz elli yedi senesi Zilkaʿde'sinin on dördünde medrese ru'ûsuyla nâyil-i nuhustîn-i pâye-i murâd olmuşidi. Doksan bir senesi Zilkaʿde'sinde mahrûse-i Burusa'ya hâkim ve doksan beş Muharrem'inde Mekke-i mükerreme'ye ʿâzim olup, bir sene kadar o mahall-i hatîr-i lâzimü't-tevkīrde icrây-ı ahkâm-ı şerîʿat ve inkızây-ı müddet ile Âsitâne-i saʿâdet'e ʿavdet etmişidi. Bin iki yüz Şaʿbân'ının yirminci günü Kazâ'-i Dâru's-saltana ile kesb-i şân u tantana edüp, taʿdîl-i kıyem [V 160a] ü esʿâr ve te'dîb-i muhtekirân-ı rûzgârda levha-tırâz-ı sünûh olan ikdâm u himmeti, Şehriyâr-ı mekādir-şinâsın vâsıl-ı semʿ-i dikkati oldukda, hakkında nazar-ı bende-perver-i Mülûkâne'leri tecvîz ve sene-i merkūme Zilkaʿde'sinin onuncu günü Anadolu Sadâreti Pâyesi'yle cümle-i mübheme-i hâl ü şânı temyîz olunup, iki yüz iki senesinin Cumâdelûlâ'sının on beşinde bi'l-fiʿl Sadâret-i Anadolu'ya takrîb olunup, [mısra]: