Sefîr-i mezbûr ile gûyâ mükâlemelerde izhâr-ı tavr-ı hiddet, mükâbere vü ısrârına ʿillet olup, ricâl-i devletden biri Devlet-i ʿaliyye'den [Ü4 305b] bi'l-mülâyeme mesfûr ile mükâlemeye ruhsat-yâb olsa, şiddet-i ʿarîkesini telyîn ve devlet tarafından verilan cevâb-ı müskiti kabûl ile devletine ʿözr-i Saltanat-ı seniyye'yi dostâne ifâde vü tebyîn ve miyânede hâdis olan gayz u kîn ber-taraf olacağını kibâr-ı devletden baʿzıları ilkā ve bu sûret zâhir-i hâlde müvecceh görülüp, sâbıkā Sadrıaʿzam Kethudâsı ʿÂtıf Efendi bu mâddeye me'mûr olup, sûret-i me'mûriyyeti gāyet ihfâ olunmuşiken, şeyâtîn-i ins ü ʿazâzîl ile hem-cins olan Rûsiyye ve İngiltere elçileri mâddeye vukūf ile izhâr-ı huşûnet ve Devlet-i ʿaliyye'nin gâh şânını vikāyet ve gâh bu mükâleme-i hafiyyenin ittifâka mugāyeretini ve giderek fesh-ı râbıta-i mühâdene îcâb edeceğini, Bâb-ı ʿâlî'ye takdîm etdikleri tekārîrde bast u hikâyet [V 159a] eylediler. Françe Elçisi ise Bonaparta'yı ilzâm zuʿmuyla İmperatorluk tasdîkını şâmil bir kıtʿa katʿiyyü'l-müfâd sened ahz etmek ve Devlet-i ʿaliyye tarafından mukaddemâ îrâd olunduğu üzere tasdîkde butûʾ u teʾhîr maslahat-ı mülkiyyesine mutâbakat tahsîline mebnî olup, bir müddet murûrunda İmperatorluğ'u tasdîk eyleyeceğini hâvî dîger bir kıtʿa sened almak iddiʿâsında olup, cihet-i ûlâsı uhrâya mübâyin olan senedât iʿtâsında mahzûr-ı küllî, kulûb-ı erkân-ı devlete müstevlî olduğundan, kavl-i sâbıkda izhâr-ı sebât ve terk-i televvünât kılındığını mesfûr lede't-taʿakkul vücûb-ı ʿazîmetini te'emmül edüp, evâsıt-ı Ramazân'da lâzime-i hareketini ru'yet ve Françe tarafına ʿazîmet eyledi. Re'îsülküttâb [Ü4 306a] Efendi dört-beş mâhdan berü elçi-yi mesfûr ile muʿâraza vü münâkaşa ve ser-rişteyi elden kaçırmayarak ihtiyâr-ı sûret-i mücâdele vü münâveşe etmişiken, mesfûr ʿazîmete cesâret edemeyüp, iki-üç gün zarfında vukūʿ bulan muhâbere vü mücâvebeden dil-teng-i keder ve ʿâkıbet tahrîk-i pây-ı ʿazîmete mecbûr u muztarr olduğu Re'îs Efendi'nin füshat-ı havsalasına delâlet eyleyeceği mukarrerdir.