ʿAkkâ mâddesini baʿzı me'mûrîn ifsâd ve zaʿf-ı re'y ve teşettüt-i ârâ ile berbâd eylediklerini o tarafa me'mûr Râgıb Efendi tahrîr ve sâbıkā Mîr-i hâcc Vekîli Süleymân Paşa'nın o havâlîde nüfûz u iʿtibârı olup, ʿAkkâ'da mevcûd olan müteneffisler mûmâ ileyhe müncezib ü müttebiʿ ve hâricde olan Mîr Beşîr takımı dahi emrine mutâviʿ olup, Saydâ Eyâleti maʿa-muzâfâtihâ tarafına tevcîh olunduğu takdîrde, kalʿa bilâ-meşakkatin müsahhar ve derûnunda mütehassın İsmâʿîl Paşa yâ firâr veyâ müdemmer olacağından başka, me'mûl-i devlet kadr-i nefʿ u fâyide müyesser olacağını işʿâr ve İsmâʿîl Paşa'nın fuzûlî zabt-ı memleket etmesinden ise, sûret-i tavʿ u inkıyâdda bulunan Mîr-i mîrân-ı mûmâ ileyhin hükm-i Devlet-i ʿaliyye ile Saydâ'ya Vâlî olması ihtiyâr olunduğuna binâ'en, vech-i meşrûh üzere [V 158b] eyâlet-i mezkûre maʿa-muzâfâtihâ Paşa-yı mûmâ ileyhe tevcîh olunup, iktizâ eden evâmir Efendi-yi mûmâ ileyhe irsâl olundukda, Kıbrıs'dan hareket ve Saydâ'ya ilkā-yı lenger-i ikāmet ve kazıyye-i mezkûreyi Şâm Vâlîsi ordusunda olan Süleymân Paşa'ya tahrîr u işâret eylediğinden başka, bâlâda zikr olunduğu vech üzere Dürzî tâyifesinin Sergerdesi olan Mîr Beşîr ve sâyir o havâlîde bulunan sagîr u kebîre irâde-i devleti iʿlân ve ʿavâtıf-ı seniyye-i Şâhâne'den Saydâ Eyâleti'nin Cezzâr Paşa Kethudâsı Süleymân Paşa'ya tevcîh [Ü4 305a] ü ihsân olunduğunu ifâde vü beyân edüp, cümlesi ser-fürû-bürde-i tavk-ı inkıyâd u istislâm ve izhâr-ı büşr ü ibtisâm ile müvâzıb-ı duʿây-ı Şehriyâr-ı Dârâ-gulâm olup, Sayda'da bulunan İsmâʿîl Paşa müttebiʿlerini ve muhâfaza sûretinde vazʿ eylediği segbânlarını dahi tard u ibʿâd ve Payas ve Beylan tarafından müceddeden tahrîr u celb etdiği askeri sâhile resîde olmazdan mukaddem, bi'l-istihbâr vasat-ı bahrdan geldikleri semte ircâʿ ile katʿ-ı imdâd ve bu sûretleri îkāʿa tahsîl-i tâb u tüvân ve Mîr Beşîr'in hulûsunu imtihân içün taleb etdiği askeri mîr-i mezbûr fi'l-hâl irsâl ve sâyir asker-keş olan kimseler dahi kemâl-i tehaşşüd ile emre imtisâl üzere oldukları mütehakkak oldukda, tevcîh-i cedîd emri ʿAkkâ'ya irsâl ve Saydâ Eyâleti Süleymân Paşa'ya ihsân olunduğu serân-ı asker ve sükkân-ı memlekete iblâğ u îsâl olunup, Paşa-yı mûmâ ileyh Cezzâr Paşa fürûʿâtından olmak cihetiyle ʿAkkâ'da bulunanlar bi't-tabʿ tarafına izhâr-ı meyl ü rağbet ve İsmâʿîl Paşa'dan katʿ-ı peyvend-i muvâfakat eyledikleri ahbârı resîd-i derece-i şöhret olup, İsmâʿîl Paşa mebâdî-yi hâle nazaran mütezelzil ü mütehayyir ve fursat bulursa firâra tavtîn-i nefs eylediği zâhir olduğuna binâʾen, Râgıb Efendi'nin saʿyi meşkûr ve tahsîni şâmil tarafına irsâl olunan mektûb-ı Sadru's-sudûr ile şevk u gayreti mevfûr kılındı.