An-asl Galata'da Meyhâneci olup, “Arab-oğlu” nâm zimmî kârını terk ve bir sefîne peydâ ve Mısr-ı Kāhire'den meʾzûnen ʿavdet eden on sekiz nefer mikdârı Arnabud'u sefînesine vazʿ u imlâ ve enginde merkūmlar der-hâb iken mâllarına tamaʿan birkaç neferini ihlâk ü ifnâ eylediklerini, enbârda olan pesmândeleri hiss ile sefîneye âteş ilkā ve mesfûr ile tâyifesi fi'l-hâl tahlîs-ı nüfûs-ı [V 158a] habîselerine iştigāl ve sandala binüp Rodos'a vusûllerinde, sefînelerinin istihlâkini îmâ ile setr-i serîre-i hâl etmişler idi. Takrîrlerinde mübâyenet ve tavr u hareketlerinde şâyibe-i melʿanet hiss olunduğundan, Rodos Mutasarrıfı Hasan Bey mesfûrları Âsitâne-i saʿâdet'e irsâl edüp, hakīkat-i hâli inkâr ve baʿde'l-ısrâr bâlâda vukūʿ-yâfte olan sûreti ikrâr eylediklerinde, zikr olunan ʿArab-oğlu'nun gerden-i hiyânetine havâle-i [Ü4 304b] tîğ-i âteş-bâr ve bâkīleri küreğe vazʿ ile ʿibret-i bed-endîşân-ı rûzgâr kılındı.