Ocağ turnacılarından Halîl Ağa mukaddemâ Belgrad Ağalığı'nda zûrbalar ile ittifâk ve Kadı'sı Nu'mân Paşa-zâde Sa'dullah Efendi'yi idhâl-i dâyire-i ʿahd ü mîsâk edüp, Muhâfız bulunan Vezîr Mustafa Paşa üzerine hücûm u iʿdâm ve emvâl ü eşyâsını miyânelerinde iktisâm etmişler idi. Kadı ve Ağa'nın havf-ı muʾâhaze ile baʿde'l-inʿizâl Belgrad'dan ʿadem-i hurûcları agleb-i ihtimâl olduğuna binâʾen, Efendi-yi mûmâ ileyhe Mahrec iʿtibâriyle [V 157b] Üsküdâr tevcîh olunduğu haberi tarafına iʿlâm ve kalbinden izâle-i hadşe vü evhâm olunmağla, bu sürûr ile Belgrad'dan şedd-i zeberteng-i nehzat ve vâsıl-ı Âsitâne-i saʿâdet oldukda, nefy ü iclâsı emri müʾekkillere teslîm ve hılâl-i tarîkde tesmîm olunup, Belgrad Ağası'nın iʿdâmında ʿusret ve vaktine ihâle ile her bâr hakkında ihtilâs-ı fursat derkâr iken [Ü4 304a] Bosna Ağalığı'nı taleb ve recâsı karîn-i müsâʿade-i ehl-i rüteb olup, mahall-i mezkûrda dahi hakkında siyâsetin icrâsı müteʿazzir ve bilâhare Edirne Ağalığı'na bi't-taleb mütesaddır olup, iʿdâmiyçün mukaddemce emr-i ʿâlî irsâl ve Edirne'ye vürûdundan iki gün sonra mahnûkan iʿdâm u istîsâl olundu. Devlet-i ʿaliyye'ye ihânet ve tamaʿ u garazdan nâşî hevâcis-i nefsâniyyeye mütâbeʿat eden hazele-i nâs, füshat-ı ecel ile bir zemân refâh u âsâyiş ihtilâs eylerse dahi, şehbâz-ı kazâ, mıhleb-i kahr u fenâ ile mürg-ı rûhunu iftirâs edegeldiği bu defʿa dahi tecribet-güzâr-ı erbâb-ı ʿakl u kıyâs oldu.