Bir müddetden berü ‘Akkâ sularında meks ü ârâm ve Saydâ Eyâleti'ni İsmâʿîl Paşa'ya istihlâs ʿakabinde Âsitâne-i saʿâdet'e tahrîk-i mıkzâf-ı iʿtizâm eden Kapudân-ı deryâ Vezîr ‘Abdülkādir Paşa, işbu Şa‘bânu'l-muʿazzamın yirmi beşinci Çehârşenbih günü Donanma-yi hümâyûn'u mashûben bi's-selâme mersây-ı Tersâne-i ʿâmire'ye rabt etdikden sonra, Bâb-ı ʿâlî'ye gelüp, huzûr-ı Sadru's-sudûr'da iktisây-ı semmûr ile nâyil-i etemm-i sürûr oldu. Bâlâda beyân olunduğu vech üzere müşârun ileyh Cezzâr muhallefâtı olarak yetmiş beş bin yıldız altûnuyla bin kîse tahmîn olunan mücevherât ve sâyir eşyayı getürüp teslîm ve eşyânın maʿrifet ü nezâretiyle fürûht ve Îrâd-ı Cedîd Hazînesi'ne vazʿ olunması irâdesi, Îrâd-ı Cedîd Defterdârı'na tefhîm ve İsmâʿîl Paşa'nın Saydâ tekarrürü mukābelesinde Sadriaʿzam hazretlerine ve sâyir ʿuzamây-ı devlete ber-mûceb-i defter ifrâz eylediği mebâliğ dahi, Îrâd-ı Cedîd Hazînesi'ne idhâl ve yekūn-ı mâl “Hasale mine'l-cemeli'l-ʿıkāl” meselini [V 154a] irsâl eyledi.