İşbu Şaʿbân-ı şerîfin yirmi dördüncü Salı günü kapu-kullarının iki kıst mevâcibleri Kubbe-altı'nda taʿdâd ve kabzına meʾmûrlara iʿtâ ve Hamîs günü devr olup, Silâhdâr-ı hazret-i Şehriyârî [V 153b] Süleymân Bey ile şeref-rîz-i vürûd olan teşrîfât, kadr ü şân-ı hazret-i Sadâret-penâhî'yi dü-bâlâ eyledi. Dîvân günü Korfa ve sâyir cezâyir Vekîli üç senede bir edâsına müteʿahhid oldukları mâl-ı maktûʿu edâ vü teslîm ʿakabinde ʿatebe-i gerdûn-mertebe-i Şâhâne'yi telsîm [Ü4 299b] edüp, Vekîl-i mesfûr ve maʿiyyetinde olan havâss-ı etbâʿı iktisây-ı hilaʿ ile nâyil-i meserret ve Orta-kapu pîşgâhında erbâb-ı dîvân ve tavâyif-i askerîyi temâşâ ile engüşt-ber-dehân-ı hayret oldu.