Rûsiyyelü der-dest olan ʿahid-nâme şurûtuna teşebbüs ile Vidin serhaddinde konsolos nasbını istidʿâ ve bu husûsu dostâne inhâ etmiş idi. Fi'l-asl konsolos nasbı emr-i ticâret ü mekâsibe mebnî olup, Vidin mahall-i dâd u sited ve mevzıʿ-ı ahz u redd olmadığından gayri, ehâlî-yi serhadd bu makūle muhdesât ile gayr-i me'nûs ve konsolos ikāmesi kasd olundukda, dostluğa münâfî bir hâlet tekevvünü mahsûs olup: “Devleteyn-i müttefikayn yek-dîgerin umûr-ı mahsûse [V 153a] ve mevcûdesinde fâyide vü zararı mülâhaza ve ʿâdât u rüsûm-ı mülkiyyesini muhâfaza vâcib ve bu istidʿâdan keff-i yed münâsibdir” deyerek Re'îsülküttâb Efendi tarafından katʿî cevab verildikde, Rûsiyyelü tarafından baʿzı maglata îrâd olunduysa dahi, bast olunan ecvibe-i müberhene kalb-i sengînlerini ilâne ve bu daʿvâdan dest-şûy-ı [Ü4 299a] ferâğ olduklarını izhâr u ibâne eylediler. Nemçe İmperatoru bâlâda beyân olunduğu vech üzere Nemçe İmperatorluğu'nu hânedânına tahsîs u takrîb ve izâfeten Avusturya İmperatorluğu'yla dahi telkīb olunmak üzere Bonaparta'nın İmperatorluğu'nu kabûl etmekle, mâddeteyn-i mezkûreteyn, yaʿnî Nemçe İmperatoru'nun ʿivaz u mukābele sûretinde ihrâz etdiği mekāsıd, Devlet-i ʿaliyye tarafından dahi tasdîk olunmak husûsu Nemçe Elçisi tarafından meclis-i mükâlemede beyân olunmuşidi. Zikr olunan keyfiyyet Bonaparta'nın İmperatorluk Rütbesi'nden neş'et ve Bonaparta'nın henûz İmperatorluğu Devlet-i ʿaliyye tarafından tasdîk olunmayup, umûr-ı dâhiliyyesine tatbîk ile kabûl mevʿûd olmağla, hîn-i tasdîkde Nemçe İmperatoru'nun dahi bu imtiyâzı tahkīk olunacağı Re'îsülküttâb Efendi tarafından ifâde vü taʿlîk ve Nemçe Elçisi dahi bu kavli karîn-i semʿ-i rızâ ve Devlet-i ʿaliyye'non vaʿd-i meşrûtunu devletine inhâ eyledi.