Kāhire-i Mısır'ın vâridâtını cemʿ u taksîm ve dahl ü harcını taʿdîl ü tanzîm [V 152b] içün bir Defterdâr nasbı mukaddemâ tasmîm olunup, baʿde'l-feth Şerîf Paşa ve baʿdehû Recâ'î Efendi bu hıdmete me'mûr ve mûmâ ileyhimânın çi-gûnegî-yi hâlleri mukaddemâ keşîde-i silk-i sutûr kılınmışidi. Vukūʿ bulan ihtilâl hasebiyle bu âna dek o hidmet-i lâzimeye bir kimse tahsîs olunmayup, Mısır'ın vâridâtı eyâdî-yi bîgâneye giriftâr ve hân-ı yağmâ gibi gürûh-ı mütegallibîne lokma-i şîrîn-güvâr olup, bu esnâda [Ü4 298b] fazl-ı hazret-i Bârî ve teveccüh-i cenâb-ı Tâc-dâri'yle sınıf-ı ümerâ seyf-i siyâset ile makhûr ve fırka-i Arnabud cihet-i iʿtidâle tenzîl ile nizâm-ı memleket meysûr ve bu sebeble Mısır Defterdârlığı'nın efrâd-ı müteşahhısadan birine tefvîzi min-ehemmi'l-umûr olup, bundan akdem Süveys Gümrükcülüğü takrîbi ile âşinây-ı ahvâl ve kendüden hidemât-ı nâfiʿa husûlü me'mûl-i erbâb-ı ʿizz ü ikbâl olan Ahmed Efendi, mansıb-ı mezkûrun husûliyçün dest-bâz-ı temennî vü niyâz olup, hakkında mekârim-i Şâhâne zâhir ü bedîd ve işbu Şaʿbânu'l-muʿazzam evâyilinde Mısr-ı Kāhire Defterdârlığı'yla kühen-tırâz-ı kumâş-ı câh u iʿtibârı ceyyid ü cedîd oldu.