baʿzı meberrâta sarf ile tahsîl-i zâd-ı yevm-i mevʿûd kılınup, el-yevm tarîf u telîd bir şey' terk etmeyüp, baʿzı ʿaşâyir ve nâs zimmetlerinde alacağı olmağla, Mübâşir taʿyîni ile cemʿ u tahsîl olunduğu takdîrde, bir mikdârı mîrîye ve bâkīsi tarafına verilmesini istidʿâ ve aʿyân-ı hâcc ve sâyirden bu defʿa alınan emvâlin baʿzısı pederi hayâtında müstehlik olup, bâkīsini redd ü edâ edeceğini [Ü4 298a] inhâ etmişidi. Mezbûrun iltimâsı üzere tahsîl-i zimem içün fermân ile Mübâşir taʿyîninde mahzûr tasavvur olunmayup, emvâl-i hüccâc istihlâsıyla şâyed bir mikdâr bedel-i muhallefât husûlü dahi mümkin olacağı mülâhazâtı mutâlaʿât-ı erbâb-ı ʿukūla tevâfuk etmekle, binâ-berîn o tarafların nizâmı ve Küçük ʿAli-oğlu fürûʿâtının bi'l-külliyye inʿidâmı vâbeste-i kayd-ı ʿazîm olduğu hâlde, baʿzı temhîdât ve tehdîdât ile o havâlî umûru ʿuhdesine tefvîz olunup, pederi merkezine vusûl emedd-i medîde muhtâc olmağla, “Mine'l-ʿamûdi ile'l-ʿamûdi ferecün” iktizâsıyla, anın dahi vaktiyle çâresi görülmek karâr-gîr-i re'y-i Âsafî olup, binâ'en-ʿalâ-zâlik bir tarafdan mûmâ ileyhim taraflarına irsâl olunan emrnâmelerin ecvibesine intizâr ve bir tarafdan merkūmun recâ-mend olduğu zimem fermânı Mübâşir ile o tarafa tesyâr olunup, bundan sonra keyfiyyet ne vechile sûret-pezîr olursa, muktezây-ı hâl ü şân üzere hareket, savâb-dîd-i evliyây-ı devlet oldu.