Mûmâ ileyhin hâl ü şânı bâlâda ber-vech-i îcâz beyân u ifâde olunmuşidi. Müddet-i medîdeden berü Payas ve o havâlîde mürtekib olduğu şekāvet ü iblâs, maʿlûm-ı kâffe-i nâs olup, âyib ü zâhib ve âyid ü râciʿden bâc nâmıyla keyfe mâ-yaşâ, ahz-ı emvâl ü eşyâ ve ʿale'l-husûs kāfile-i hâcc ʿavdetinde tüvângerlerini nehb ü yağmâ ve zuʿafâsını pâ-zede-i cevr ü cefâ edüp, te'dîbi zımnında üzerine asker taʿyîn olundukça, Payas'a müşrif cebel-i saʿbü's-sülûkda vâkiʿ mekân-ı hasîn ve maʿkıl-ı metînine suʿûd ve esbâb-ı zafer bu vesîle [ile] mesdûd olduğundan, bi'z-zarûre asker âvd u kufûl ve merkūm dahi kemâ-kân kazâya nüzûl ve kârına meşgûl olur idi. Bu hâl ile dimâğında hevây-ı merâtib cây-gîr ve baʿzan devlete mürâcaʿat ile izhâr-ı mâ-fi'z-zamîr edüp, taht-ı râbıtaya duhûlü ihtimâliyle ʿUzeyr Sancağı tarafına tevcîh ve evzâʿ-1 sâbıkasından tevbe ve rucûʿu tenbîh olunmuşidi. Bir müddet gâh tuğyân ve gâh itāʿat sûretiyle nümâyân ve baʿzı zevât sevkiyle Mîr-i mîrân olup, çok geçmeden cibilletinde merkūz olan gadr u cevre mübâşeret ve ebnây-ı sebîli kâyinen-men-kân berhemzede-i mazarrat edüp, hüccâcı istikāmet-i tarîkden inhirâfa ʿillet ve dûr u dirâz yollara ilkā ile mübtelây-ı envâʿ-1 mihnet edüp, bu vazʿ-ı nâ-hemvâr tegallüben nâyil olduğu menâfiʿa muzırr olduğunu mütefekkir ve tecdîd-i îmân ve ʿuhûd ile kâr-fermâyân-ı devleti iğfâl ve hezâr mekr [Ü4 297a] ü âl ile hüccâcı kemâ-kân Payas yolundan imrâra ruhsat istihsâl edüp, geçen sene etdiği fesâd u zarar ve aʿyân-ı hâcc ve sâyirden vechi yok behâneler ile aldığı eşyâ ve nukūd ânifen muharrer u mastûr olup, küllî tedârük ile cezây-ı mâ-yelîkı verilmek musammem iken, bu esnâda hâlik ve girîve-i ʿâlem-i cezâya sâlik olduğu haberini oğlu Mehmed Bey Der-i devlet'e tahrîr edüp, pederi merkūmun teʿayyünât u imtiyâzâtı tarafına tahvîl olunduğu hâlde, Devlet-i ʿaliyye'ye her vechile mutîʿ u münkād olup, pederi isrine iktifâ etmeyeceğini îrâd etmişidi. Hâlik-i mezbûrun bu defʿa hüccâca etdiği ihânet gayretullah zuhûruna ʿillet olup, ne vechile latme-hor-i dest-i kazâ olacağı muntazır-ı erbâb-ı basîret iken, muktezây-ı ser-nüvişti üzere hatfe enfihî helâk ve üftâde-i hufra-i hâk oldu. [Mısra]: Rakīb olsun ne yüzden ise mevti ko, hemân ölsün merkūmun fevti sebebi ile o havâlînin umûru oğlu Mehmed Bey'e ihâle olunsa, nazm: 'Âkıbet gorg-zâde gorg şeved / Gerçi bâ-âdemî büzürg şeved mefhûmu üzere babasının tavr-ı nâ-hemvârı üzere hareketden ibâ etmeyüp, “el-ʿIrku nezzâʿun” me'âlinden münbaʿis olan vazʿ-ı mevrûs ile ʿamel ve bi'l-muʿâyene pederinden ahz etdiği fesâdât ve kalbinde izmâr etdiği baʿzı muhtereʿâtı icrâya fursat-yâb olup, giderek “Rahimallâhu'n-nebbâşe'l-evvel” kavliyle babasına rahmet okutdıracağı bürhân-ı ʿaklî ile müstedlel olmağla, ser-rişte-i fursat der-dest iken, o tarafın nizâm-ı hâli tedbîr ve tarîk-ı hâcc feth u teshîr olunmak mevsimleri gelüp göründüğüne binâ'en, [Ü4 297b] bu keyfiyyet ya'nî esbâb-ı nizâm Marʿaş Beylerbeyisi Kalender Paşa ve Beylanlı ʿAbdullah Bey ve Adana Mütesellimi Ahmed Bey'den istiʿlâm olunup, tahkīk-ı mâddeye dek hâlik-i mezbûrun oğluna hâb-ı hârgûş verilüp, tasavvurundan me'yûs u nevmîd etmamek tedbîrâtı taraf-ı Sadru's-sudûr'dan ser-zede-i sâha-i zuhûr ve ber-minvâl-i muharrer merkūmlara kavâyim-i ʿaliyye ve Mehmed Bey'e dahi nush u pendi mutazammın mektûb tahrîr olunduğundan başka, pederinin ezmân-ı sâlifeden berü hüccâc ve tüccârdan ve sâyir etrâf ve ebnây-ı sebîlden tavʿan ev kerhen igtisâb eylediği emvâl, bâliğ-i meblağ-ı kemâl ve ʿale'l-husûs bu defʿa hüccâcın kati çok eşyâ ve nukūdun alup, kesret-i muhallefâtı tehakkuk etmekle, hüccâcın magsûb olan emvâli kalîl ü kesîr, nakīr u kıtmîr cümleten istirdâd olunup, bedel-i muhallefât olarak cânib-i mîrîye me'mûl derecesinde hıdmet eylediği takdîrde, Mîr-livâlık ile ʿUzeyr Sancağı tarafına tevcîh olunacağı taraf-ı Sadâret-penâhî'den tahrîr ve ol vechile tebşîr olunmuşidi. Mîr-i merkūm pederinin meclûbâtı olan eşyâ ve nukūd ʿalâ-zuʿmihî hayâtında [mısra]: