Rütbe-i Vezâret'le kadri ʿâlî ve Eyâlet-i Mısır'a Vâlî olan Hurşîd Paşa'nın matlaʿ-ı Vezâret'inden bu âna gelince tavr u hareketi makbûl-i erbâb-ı ʿukūl ve reʾy ü tedbîri hâric ez-hadd-i meʾmûl olup, tegallüb-i zümre-i ümerâ ve tesallut-ı gürûh-ı ehl-i cevr ü hevâ ile baʿde'l-feth Mısır'a târî olan fesâd u ihtilâlin indifâʿını rûz u şeb gāyet-i bağyet ü matlab eyleyerek, tavâyif-i askerîyi hükmüne râm ve memâlîk ü ʿabîdi Mısır'dan ihrâc ve Saʿîd'e tard ile izhâr-ı kuvve-i Saltanat-ı ebed-kıyâm eylediğinden başka, şiddet-i hırs u tamaʿ ile ifnây-ı defâyin ü hazâyin eden Arnabud askerini taʿdîl ve aylık nâmıyla matlûbları olan mebâliğ-i kesîreyi bir hadd-i gayr-i müfrita rabt ve edâ ile cümûʿ-ı zâyidelerin taklîl eylediğinden başka, cânib-i Hicâz'a Şâm tarafından küllî asker ile Cidde Vâlîsi Vezîr Mehmed Paşa ve Emîr-i Rekb-i Şâmî olan Vezîr İbrâhîm Paşa'nın me'mûriyyetleri mukaddemâ Devlet-i ʿaliyye tarafından müşârun ileyhe ifâde ve Mısır cânibinden dahi Yenbûʿ İskelesi'ni zabt içün münâsib bir Başbûğ nasb olunması irâde olunduğuna binâ'en, beş-altı yüz nefer ile bâlâda zikr olunduğu vech üzere Mîrâhûr'una Mîr-i mîrânlık tevcîh edüp, o tarafa tesyîr eylediğini Şerîf-i Mekke cenâblarına tahrîr u işâret ve bu keyfiyyet Şerîf-i müşârun ileyhe bâʿis-i kuvvet [Ü4 296a] olup, Yenbûʿ İskelesi'ne sevk-ı ecnâd ve iskele-i mezbûreyi zabt ile [V 152a] o havâlîde kâyin eclâf-ı Aʿrâb'ı tard u ibʿâd eylediğinin ikinci günü asâkir-i Mısrıyye dahi Yenbûʿa vâsıl ve bu sebeble bukʿateyn-i mübâreketeyn halkına tuma'nînet-i kalb hâsıl olduğundan gayri, ümerânın bundan akdem havâlî-yi Mısır'da geşt ü güzârları hasebiyle Saʿîd tarafı hâlî kalup, Haremeyn tarafında zehâyirin kılletini beyʿ u şirâ ile intilâf edenlerin baʿzısı istihbâr ile mevcûd olan zehâyiri ber-vech-i tedrîc Kusayr İskelesi'ne nakl ve andan Yenbûʿa îsâl ve âsumân-ı muʿtedile ile ehâlî-yi Haremeyn'e beyʿ ve sebeb-i indifâʿ-ı kaht u imhâl oldukları keyfiyyetini müşârun ileyh tahkīk u îkān ve ol dahi irsâl-i zehâyirde kusûr etmeyeceğini zikr u beyân eylediğinden başka, Saʿîd tarafında mukîm olan bugāt-ı ümerânın bîh-ı cemʿiyyetlerini bi'l-külliyye katʿ ve vücûd-ı habâset-âlûdlarını kutr-ı Mısır'dan izâle vü refʿ mekāsıdıyla mukaddemâ berren ve bahran tertîb etdiği asâkirden başka, Ser-çeşme Mehmed ʿAlî'yi dahi verâlarından işbu Recebü'l-ferd evâsıtında vâfir asker ile taʿyîn eylediği, hulâsa-i mefâhîm-i tahrîrâtından müstebân olup, şimdiye dek müşârun ileyh tarafından levha-tırâz-ı sünûh olan hidemât-ı pesendîde muvâfık-ı hüsn-i rızâ ve bu sebeble hakkında teveccüh-i evliyây-ı niʿamâ, resîde-i hayyiz-i intihâ olup, fîmâ-baʿd gerek ahvâl-i Mısrıyye'nin kemâ-yenbagī tanzîmine ve gerek Hicâz cânibine lâzım gelan iʿânetin istikmâline saʿy-i evfâ etmek irâde-i kātıʿası bu defʿa dahi Sadr-ı sütûde-ârâ tarafından [Ü4 296b] savb-ı müşârun ileyhe tahrîr u inhâ olundu.