Bâlâda beyân olunduğu vech üzere Cezzâr Paşa'nın terk ettiği emvâl-i firâvânı teslîm ʿakabinde İsmâʿîl Paşa'ya mansıb ve dâiresini tanzîm içün bir mikdâr meblağ ihsân olunmak ve muhâlefet etdiği takdîre berren ve bahran üzerine hücûm ile kalʿayı tahlîs ve muhallefâtın cümlesine dest-res olmak keyfiyyâtı me'mûrlara tefhîm olunmuşidi. Müşârun ileyh zâtında mütemellik ve ʿazbü'l-kelâm ve umûr-ı hâriciyye ve hiyel-i şeytâniyyede müdebbir ü benâm olmakdan nâşî, Kapudan Paşa tarafına ilticâ ve Saydâ Eyâleti [V 147b] tarafına tevcîh olunduğu hâlde, Cezzâr Paşa'nın cemîʿ muhallefâtını teslîm ü iʿtâ ile tahsîl-i [Ü4 291b] rızâ eyleyeceğini inhâ edüp, Kapudan Paşa dahi leyyinü'l-cânib ve sâde-dil ve zevâhir-i ahvâle nazar ile ʿavâkıb-ı umûrdan gāfil olup, kalʿanın metânetini ve hîn-i hasr u tazyîkde donanmanın rahne-dâr olmak sûretini mülâhaza ile semt-i sühûleti ihtiyâr ve Saydâ'nın müşârun ileyhe tevcîhini maʿrûz-ı Dergâh-ı ʿâdâlet-karâr eyledikde, teslîm edeceği muhallefâtın suver u aʿyânı maʿlûm olmak içün Cezzâr Paşa Kapu Kethudâsı Rüşdî Efendi taʿyîn ve muhallefât defteri vürûdunda nakd ü cins zann u tahmîn-i devlete tevâfuk etdiği hâlde, niyâzına müsâʿade olunacağı ifâde vü tebyîn olunmuşidi. Rüşdî Efendi o tarafa varıncaya dek Şâm Vâlîsi dahi asker-i kesîf ile ʿAkkâ Sahrâsı'nı madrab-ı hıyâm ve derûn-ı kalʿada bulunan serân-ı asker ve ehâlîyi celb ile teshîr-i kalʿaya hasr-ı sâʿid-i ihtimâm eylediği hengâm, Rüşdî Efendi ʿAkkâ'ya varup, müsâʿade-i devlet îhâm ve muhallefâtın mikdâr u kemmiyyetini istifhâm eyledikde, zâhirde olan eşyâ me'mûl-i devletden sad mertebe dûr olduğu hüveydâ olup, bu keyfiyyet me'mûrlara sebeb-i teşvîş ü ihtilâc ve Mîr-i mîrân Süleymân Paşa ile hufyeten istimzâc ve Saydâ tarafına tevcîh olunduğu takdîrde, cemîʿ muhallefât nakden ve cinsen zâhire ihrâc ve Devlet-i ʿaliyye me'mûrlarına teslîm ve fîmâ-baʿd emr ü hükm-i Cihân-dârî'ye gerden-dâde-i tavk-ı inkıyâd olacağını beyân u tefhîm edüp, tavr-ı tegallüb ile ibkā-yı Vezâret'e tâlib olan şahıs, magzûbe [V 148a] [ve] eser-i ʿisyân müşâhede olunmayan kimse her hâlde müreccah görülmekle, Saydâ menşûru [Ü4 292a] Süleymân Paşa'ya irsâl ve teʿahhüdü üzere nakīr u kıtmîr muhallefâtın devlet me'mûrlarına teslîmi istiʿcâl olunmuşiken, tekrâr Kapudan Paşa'nın tahrîrâtı gelüp, İsmâʿîl Paşa emr ü irâde-i devlete mütemessil ve muhallefâtın edâ vü teslîmine şurûʿ ile şimdiye dek bir mikdâr nakd ve bir mikdâr eşyâ sanâdıkı, eyâdî-yi me'mûrân-ı devlete mütevâsıl olduğunu mütevakkıl olduğundan, zarûrî eyâlet-i mezkûre Süleymân Paşa'dan intizâʿ olunup, menşûr-ı eyâlet ile ʿazîmet eden Tatar ircâʿ olunmuşidi. İsmâʿîl Paşa'nın şimdiye dek teslîm etdiği mebâliğ ve eşyâ üç bin kîseye bâliğ olmayup, Cezzâr Paşa'nın sinîn-i mütetâvileden berü cemʿ u iddihâr etdiği ecnâs-ı nukūd ve tarâyif ve tuhaf-ı nâ-maʿdûd, nühüfte-i tahte'l-arz istitâr ve bilâ-meşakkatin İsmâʿîl Paşa'nın dâhil-i hîta-i istimlâki olduğu kulûb-ı evliyây-ı devleti dâğ- dâr edüp, bu husûsa me'mûr olan Râgıb Efendi'nin ve Şâm Vâlîsi'nin saʿy ü ikdâmları ʿâtıl ve gayr-i müsmir ve Kapudan Paşa'nın zaʿf-ı re'y ile havâşî vü etbâʿına mağlûbiyyeti bu mâdde-i cesîmeyi ifsâd eylediği zâhir oldu.