Filibe [V 143a] Aʿyânı Hüseyin Bey'in sûret-i serkeşîde tavr-ı nigûhîdesi hasebiyle hılâf-ı rızâ harekete ictirâsından başka, Filibe Nezâreti'ni geçen sene nefsine istihlâs içün ehâlîye ʿarz u mahzar tahrîr ve cebren [Ü4 287a] Nezâret'i tahsîl eylediği, hakkında nâr-ı gazab-ı evliyây-ı devleti ʿalev-gîr eyleyüp, birkaç yüz segbân ile âzmâyiş-i zulm ü hasâret ve muhâlifân-ı devlet ile nihânî ittihâd u muʿâzadat eylediği dahi tehakkuk eylediğinden, iʿdâm u izâlesi husûsu eğerçi mukaddemâ Rumeli Vâlîsi'ne îmâ olunmuşidi. Ancak maksûdun bizzât Tokadçıklı olup, merkūmun şuglü ile iştigāl, murûr-ı vakt îcâb edeceği min-aglebi'l-ihtimâl olduğundan, teʾennî ve taʿcîl emirlerinde müşârun ileyh tahyîr olunmuşidi. Bidâyet-i hâlde o makūle hâyin-i hâyifleri tatmîn ve ahadühümâyı âhara iltihâkdan sarf içün zâhirde teʾmîn lâzım geldiğinden, izâlesi teʾcîl ve suver-i emniyyeti tahsîl olunup, sâyir aʿyânlar gibi müşârun ileyh ile hatt u tirhâl ve bitâne-i umûr mesâbesinde baʿzan kendüsiyle müşâvere-i ahvâl olunur idi. Tokadçıklı gāyilesi ber-taraf olduğundan, işbu Recebü'l-ferd gurresinde zikr olunan Hüseyin Bey ve eşkıyây-ı mütemerridînden Menlikli ʿOsmân Bey birâderi İbrâhîm Bey ihzâr ve seyf-i siyâset-i Serʿaskeri'yle serleri bürîde-i deşne-i hûnhâr kılınup, hevâdârlarının dahi baʿzıları maktûl ve ecel-i nâ-resîdeleri vâdî-yi ʿazîmete mevsûl ve ʿale'l-husûs bir müddet dağlı eşkıyâsıyla tahrîb-i bilâd ve bir müddetden sonra maktûl Hüseyin Bey'e istinâd ile [V 143b] kâffe-i fesâdda rehberi ve ʿumûm-ı mazarratda pîşrevi olan Dervelli be-râhû-garlân Bölük-başı dahi iʿdâm ve vârid olan ru'ûs-ı maktûʿaları galtîde-i ʿibret-gâh-ı enâm kılındı. Seyf-i sarâmet-i Şâhâne ile hablü'l-verîd-i hayâtı münkatıʿ olan Tokadcıklı'nın yeğeni Hüseyin [Ü4 287b] ve dîger yeğeni Hüseyin, Rumeli Vâlîsi'nin gümâşteleri yedinde katîl ve hayyen ele giren yirmi iki nefer eşkıyâ ile Der-i devlet-medâra tavsîl olunmuş olmağla, kelleler tarh-ı ʿibret-gâh ve diller âvizân-ı güzer-gâh kılındı.