Bağdâd Vâlîsi Vezîr ʿAli Paşa'nın Dirʿiyye üzerine sürʿat-i hareketi Hâricîler'e ilkāy-ı dehşet ve âhar mahallere tecâvüzlerini menʿa ʿillet olacağı mülâhazalarını şâmil pey-der-pey tarafına tahrîrât tesyâr ve müşârun ileyh dahi suʿûbet-i tarîk ve mülâhazât-ı sâyire ile ikdâm u ihcâm tavrını ihtiyâr eylediğinden, Hâricîler ʿIrâk [V 142b] tarafından tekevvün eyleyecek gāyileden emîn ve her tarafa itâle-i dest-i mekr ü kîn eyledikleri zâhir ü müstebîn olmağla, bir ân akdem yâ bi'n-nefs yâhûd münâsib Başbûğ ile [Ü4 286b] icrây-ı me'mûriyyetine berzede-dâmân-ı iktidâr ve fîmâ-baʿd îrâd eyleyeceği aʿzâr-ı vâhiyyeye havâle-i semʿ-i iʿtibâr olunmayacağı tazmîniyle bâlâsı hatt-ı hümâyûn ile müvaşşah emr-i Cihân-mesîr ısdâr ve tevbîhât ve takrîʿât-ı Husrevâne ile müşârun ileyh inzâr olunup, Hasekî Ağa hâssaten irsâl ve kürsî-yi hükûmeti olan Bağdâd'dan tahrîki istiʿcâl olunmuşidi. Müşârun ileyh tenbîhât-ı Şâhâne'den ʿavâkıb-ı ahvâlini teʾemmül ve katʿ-ı peyvend-i tekâsül ile ʿazîmete tavtîn-i nefs eylediğini Hasekî Ağa ʿavdetinde tekavvül edüp, şöyle ki, miyânede vukūʿ bulan terâhî-yi zemân bu kâr-ı düşvârın esbâb-ı sühûletini istihsâl ve etrâfdan cemʿ olunan asâkir ve mühimmâtı istikmâl kasdına mebnî olup, hasbe'l-imkân bu garaz husûle geldiğinden fazla, ʿAcem tâ'ifesinin cihet-i uhrâ ile meşgūl bulunmaları hâtırda cevelân eden baʿzı mahzûru ber-taraf u ilgā ve bu asker-i girânı idâre eder Başbûğ'un fikdânı sebebi ile bi'n-nefs ʿazîmet ü teveccühünü tabîʿat-ı maslahat îcâb eylediğini inhâ ve vakt-i harîfde fazl-ı Mevlâ ile Dir'iyye'ye doğru ʿazîmet ve ez-dil ü cân icrây-ı meʾmûriyyet edeceğini beyân u tenmîk ve Hasekî Ağa dahi bu ahvâli şifâhen teʾyîd ü tasdîk eyledi.