Güzel-hisâr Muhassılı ile Îrâd-ı Cedîd iltizâmâtını müteahhid olan Alay-beyi dâyimâ münâfese üzere olup, Nâ'ib bulunan kuzatdan Ali Efendi dahi Muhassıllık tervîc-i maslahatına tekayyüd eylediğinden, berü tarafın mebgūzu olmağla, nâ-gâh bir madde zımnında Alay-beyi taraf-dârları îkāz-ı fitne vü âşûb ve Nâyib-i merkūmun hûn-ı nâ-hakkını seyf-i gadr ile rîhte vü meskûb eyledikleri haberi vürûd edüp, Nâyib'in hırs u tamaʿa mebnî cânib-i âhara meyl ü rükûnu sebebi ile tarafından bazı efâʿîl-i nâ-marziyye zuhûr etdiği hâlde, bi'l-iştikâ ʿazli mümkin iken o makūle erâzil ü eşhâsın hükkâm-ı şerʿe itâle-i dest ile ihrâk-ı dem misillü keyfiyyete cesâretleri, teʾdîb ü gûşmâllerini îcâb ve bu husûsa o taraf ile ülfet-i kadîmesi olup, sâbıkā Baş-bâkī olan Mehmed Ağa intihâb ve iktizâ eden evâmir ile o tarafa izhâb olunmuşidi. Mûmâ ileyh Güzel-hisâr'a karîb mahalle vardığını ehâlîye ihbâr ve iki taraf istikbâline şitâb ile kenâr-ı şehirde muhârebeye ibtidâr eylediler. Muhassıl tarafı zûr-mend ü kuvvetli bulunmağla, Alay-beyi fırkasını perâkende vü perîşân ve birkaç kimseyi katîl-i seyf-i berrân etdikden sonra, Mübâşir'i şehre alup, Nâ'ib'in kātillerinden iki nefer kimseyi mukayyed ü maglûl izhâr ve cezâlarını [V 142a] tertîb ile resm-i siyâseti izhâr etdiklerinden gayri, fîmâ-baʿd bu makūle tavr-ı edebden hâric harekete ictisâr etmemek üzere sâyir ehâlî nezr-i girâna [Ü4 286a] katʿ ve ihtilâl-i belde bi'l-külliyye defʿ olunup, Alay-beyi dahi firâr u gaybet ve Âsitâne'ye gelürse maglatasına havâle-i semʿ-i rağbet olunmamasını Mübâşir-i mûmâ ileyh tahrîr u ifhâm ve Müvellâ taʿyîn olunan müderrisînden Çukadâr-zâde Tâhir Efendi iʿlâm etmekle, nezirleri Baş-muhâsebe'ye kayd olunup, Mübâşir-i mûmâ ileyhin hidmeti meşkûr ve ʿavdetiyçün emr-i ʿâlî şeref-rîz-i sudûr oldu. Tahkīkāt-ı erbâb-ı hads ü yakîne nazaran, Aydın ehâlîsi ʿumûmen ve Güzel-hisâr ehâlîsi husûsan sehlü'l-kıyâd, muztaribü'l-fuʾâd bir tâʾife olup, hükkâm ve vülâtın sademât-i müteʿâkıbelerine sabr u tehammülleri meşhûr ve esnâfdan birinin ednâ cünhası zuhûr etdiği hâlde sınıfıyla habs ve müsâdere olundukları sicillâtlarında mastûr iken, bu defʿa cesâret etdikleri hâlet, müteneffisân-ı memleketin celb-i mâla müteʿallık iğvâ vü tahrîklerinden neşʾet ve yâhûd garâmet-i mâliyyeye ʿadem-i tâkatlarından münbaʿis bir keyfiyyet olduğu zâhirdir.