Bâlâda tahrîr olunduğu vech üzere Eyâlet-i Şâm teʿahhüdât-ı maʿlûme ile Vezîr İbrâhîm Paşa'ya verilüp, imtidâd-ı vakt hasebiyle tavr-ı beldeye vukūf-ı tâmmı olup, vaktinde erbâb-ı [Ü4 279b] şekā dahi me'lûf oldukları habâsete fursat bulamadıklarından, hulûl-i ecânibden tevakkī ile oğlu Mehmed Bey'e bâ-Rütbe-i Vezâret Haleb Eyâleti'nin tevcîhi vecîh görülmüşidi. Ehâlî-yi mezbûreden semt-i hılâfa tetarruk ile celb-i nefʿ ü cedvâyı iʿtiyâd eden baʿzı hevâ-perestân-ı rûzgâr, ihtilâs-ı vakt ile zâhir-bînân-ı ʿavâmmın ʿaklına mülayim baʿzı uglûta serdiyle isâre-i gubâr-ı nifâr edüp, cemʿiyyete mübâşeret ve etrâfda hatt u tirhâl üzere olan kabâyilden cemʿ-i vefîr isticlâbıyla kesb-i kuvvet ü kesret eyleyerek, Vâlî-yi cedîdi zecren ve kahren memleketden ihrâc u ibʿâd ve sâlik-i ficâc-ı şerr u fesâd oldukları haberi, vâsıl-ı semʿ-i devlet olup, müşârun ileyhe menşûr-ı eyâlet vusûlünün üçüncü günü bu hâdise zuhûr eylediğine binâʾen, ehâlînin ʿazv ü isnâd eyledikleri zulm ü gadr, dîk-ı zemân sebebi ile kizb-i sarîh ve ʿadem-i itâʿat-i ulu'l-emrden münbaʿis bir fiʿl-i kabîh olduğu zâhir olup, müşârun ileyhe âhar mansıb tevcîhinde ehâlînin fîmâ-baʿd ruʿûnet ü şekāvetleri efzûn olup, vülâtı tahte'l-kahr kullanmak ve istedikleri gibi memleketde [V 136a] atup tutmak hâletleri tekevvün eyleyeceği ve cebren müşârun ileyhi beldeye idhâlde dahi tarafeynden nüfûs-ı kesîre zâyiʿ ve baʿzı ehl-i ʿırz ve kazıyyede medhali olmayanlara zarar u hasâret terettübü emr-i vâkiʿ olduğundan, ıslâh-ı zâtü'l-beyn mesleği ihtiyâr ve tarafeyne nush u pendi şâmil tahrîrât irsâliyle tahvîf ü inzâr ve bu husūsa Sadrıaʿzam hazretlerinin sâbıkā Hazînedârı olup, Dergâh-ı [Ü4 280a] ʿâlî kapucu-başılarından Hulûsî Ahmed Ağa mübâşeretiyle tesyâr olunduğundan başka, Belde-i Haleb müteneffislerinden Câbirî-zâde'ye te'lîf-i tarafeyn husūsu makām-ı Sadâret-i ʿuzmâ'dan ber-vech-i dikkat tahrîr ü işâret olunup, müşârun ileyhe dahi mazâ-mâ-mazâ mesleğine zehâb ile ahz-ı sâr dâʿiyyesinden ve zûr-bâzû ile duhûl fikrinden ferâğ ve tefrîg-i dimâğ etmesi mufassalen tahrîr ü iblâğ olundu.