el-Yevm hükümrân-ı memâlik-i Îrân olan Baba Hân'ın muʿtemedü'd-devlesi olan Şefîʿ Hân'dan Sadriaʿzam ve bedr-i efham hazretlerine Mehmed Hân sefâretiyle bir kıtʿa mektûb vürûd edüp, mazmûnu Memâlik-i mahrûse'ye âmed-şüd eden tüccâr ve züvvârın melhûz-ı nigâh-ı reʾfet ü himâyet olmasından ve Memleket-i Cihân-bânî'den Rûşen Kalʿası'nda temekkün eden Caʿfer-kulı Hân'ın tard u ibʿâd ve taraflarına istirdâdından ʿibâret olup, o makūle züvvâr ve sûdâ-gerânın esbâb-ı emniyyetlerine ʿale'l-ıtlâk iʿtinâ vü dikkat, ʿan-asl şîme-i Devlet-i ebed-müddet'den olduğuna nazaran, serhadlerde bulunan vülât ü hükkâma neşr-i evâmir ü ahkâm ve beyne'd-devleteyn münʿakıd [V 127b] olan ʿuhûd u şurûtun muhâfazasına dikkat ü ihtimâm etmeleri her bâr ifâde vü ifhâm olunup, şimdiye dek kemâl-i safvetden gayri bir keyfiyyet vukūʿ bulmayup, [Ü4 269a] cûy-bâr-ı şerâyit-i müsâleme mecrây-ı kadîmi üzere hass u hâşâk-ı fesâddan sâlim ve vücûd-ı şûr u fiten galebe-i istirâhat u âsâyiş ile hufte vü nâyim olduğu beyânıyla, Caʿfer-kulı Hân metbûʿu olan il ve kabîlesiyle kalʿa-i mezbûrede mütehassın olup, cebr ü ikrâh ile ihrâc, kazıyye-i muhârebeyi intâc ve bu tavr Îrânîler'in inkisâr-ı kulûblarına bâdî olup, indirâs-ı esâs-ı safvet daʿvây-ı lâgıyesine teşebbüs edecekleri fikr-i dûr-endîş ile zevâhir-i ahvâlden istihrâc ve el-hâletü hâzihî bu tarafdan kasrî ihrâcı Îrâniyân'ın mizâcına muvâfik geleceği, mefhûm-ı tahrîrâtdan maʿlûm olduğuna binâ'en, kalʿa-i mezkûreye mücâvir olan vülât ü hükkâma hükm-i Cihân-mutâʿ-ı Sultânî ısdâr ve bi-eyyi-vechin kân tahsîl-i esbâb-ı ihrâcına bezl ü kudret eylemeleri tenbîhi ifâde vü tekrar olunduğu, makâm-ı Sadâret-i ʿuzmâ'dan ifâde ve sefîr-i mûmâ ileyh iʿâde olundu.