Belgrad Muhâfızı Vezîr Hasan Paşa pîr ü müsinn ve derûn-ı kalʿada bulunan eşkıyâ müşârun ileyhin ʿaczi sebebi ile terettüb-i siyâsetden mutmaʾinn olduklarına binâʾen, cerî vü cesûr ve irâde-i devleti icrâda sâhib-i re'y ü gayûr bir kimsenin taʿyînini zarûriyyât-ı vakt ü hâl îcâb edüp, mukaddemâ Belgrad'da Muhassıllık ile mukîm ve keyfiyyet-i serhadde vukūf ile meleke vü kābiliyyeti mücerreb-i hâdis ü kadîm olan Süleymân Ağa ile şifâhen bu husûs müzâkere olundukdan sonra, Âsitâne'den hareket ve Niş'e vusûlü tahmîn olunarak, verâsından menşûr-ı Vezâret ve Belgrad [Ü4 266a] Muhâfızlığı'nın tevcîhi emri irsâl olunmak tasmîm olunmuşidi. İşbu Rebîʿulâhır evâhirında ber-vech-i muharrer silk-i vüzerâya idhâl ve muhâfaza-i mezkûre tevcîhi ile makzıyyü'l-âmâl kılınup, müşârun ileyh mukaddemâ o havâlî nizâmına me'mûr Bosna Vâlîsi Vezîr Bekir Paşa'nın maʿiyyetine tahsîs olunup, fazl-ı Hakk ile Belgrad'a duhûlünde Sırb reʿâyâsını şiddet-i mutâlebât ile ʿisyâna ilcâ ve tegallüben serhadd-i Pâdişâhî'de envâʿ-ı mefâsid icrâsına ʿillet-i akvâ olan üç-beş nefer dâîleri ahz ve müşârun ileyhe teslîm ve re'y ü irâdesine tebaʿiyyet ile sâyir mesâlih-i serhaddi tanzîm etmek ve maʿâzallah [V 125a] Belgrad'a duhûl müteʿassir ü düşvâr olmak lâzım geldiği hâlde, Niş Mütesellimi Hâfız Ağa ile muhâbere ve celb-i asker ile zahîreleri katʿ u tazyîk olunmak ve Devlet-i ʿaliyye'nin garazı fesâda bâdî olan üç-beş nefer eşkıyânın istîsâli olup, ehl-i ʿırz ve kazıyyede medhali olmayanların ʿadem-i muʾâhazeleri işâʿa kılınmak vesâyâsı, mukaddemâ şifâhen ve bu defʿa tahrîren müşârun ileyhe ifâde ve Bosna Vâlîsi müşârun ileyhe dahi bu tafsîlâtı şâmil tahrîrât-ı seniyye firistâde olundu.