Belgrad yamakları, puruz ve sâyir tekâlîf-i şâkka ile Sırp reʿâyâsını tazyîk u teşdîd ve çend-nefer koca-başılarını darb u katl ile giderek o tâyifeyi dâyire-i itâʿatden tebʿîd eylediklerine binâʾen, her tarafdan ictimâʿ u ihtişâd ve bu mezâlimin esbâb-ı indifâʿını tahsîl zımnında ittifâk u ittihâd ve hâricde bulunan ehl-i İslâm'dan anlar dahi birkaç kimseyi şehîd ve dâyire-i hestîden nâ-bedîd eyleyüp, tarafeyn birbirinden selb-i emniyyet ile gubâr-ı fitneyi isâre ve Belgrad Kalʿası'nı min-külli'l-cevânib muhâsara ve ehâlîsini [V 124a] taşraya hurûcdan menʿ [Ü4 265a] u ibʿâd ve bu sûretle miyânelerinde birkaç defʿa muhârebe iştidâd bulup, reʿâyâ bu hareket-i nâ-ber-câ, müʾeddî-yi eşedd-i siyâset olacağını derk ile kemâl-i havf u vesveseye zehâb ve Nemçelü'den istiʿânet ü istimdâd eylediklerini, Âsitâne'de mukīm Nemçe Elçisi ifâde vü işrâb etmişidi. Reʿâyâ tarafından ser-zede-i zuhûr olan fiten ü âşûbun hüsn-i sûretle indifâʿı ve yamakların teʾdîb ü ıslâhları husûsâtı, hâlâ Bosna Vâlîsi Vezîr Ebûbekir Paşa'nın süpürde-i ʿuhde-i hamiyyeti kılınup, şöyle ki, tarafeyn semt-i vahşete zâhib olmamak fikriyle, iki bin kadar kapu halkıyla Belgrad'a varup, i'mâl-i ʿakl-i bi'l-meleke ile ıslâh-ı zâtü'l-beyn ve iʿdâm-ı ru'esây-ı tâ'ifeteyn ve bu sûretle nizâm mukadder olmadığı hâlde, etrâfdan cemʿ-i asker ile kahr u tathîr-i serhadde bezl-i cehd ü tâkat ve itâʿat-ı reʿâyâyı mûcib olacak keyfiyyeti tahsîle ifrâğ-ı vüs'-i miknet eylemesi bâbında, müteʿaddid evâmir-i ʿaliyye ve makām-ı Sadâret-i ʿuzmâ'dan tahrîrât-ı seniyye irsâl ve reʿâyây-ı mezkûreye Rûm Batrîki tarafından âyinleri üzere nush u pendi kâfil ve ʿavâkıb-ı umûrdan neş'et eyleyecek envâʿ-ı siyâset-i Şâhâne'yi şâmil kâğıd ahz u îsâl olundu.