Bundan akdem refʿ-i Vezâret'iyle Marʿaş'da istîsâli irâde olunup, bir takrîb firâr ve ʿAkkâ'da Cezzâr Paşa himâyesine ilticâ ile kazâ vü kadere intizâr üzere olan İsmâʿîl Paşa, müşârun ileyhin fevti ʿakabinde ʿAkkâ'da mevcûd sunûf-ı askerîyi bilâ-meşakkatin dâhil-i kabza-i tegallübü olan emvâl ile itmâʿ ve güzeşte ʿulûfe nâmıyla vâfir akça sarf u nisâr edüp, o makūle behâyim-sîretân-ı ʿavâmmı re'y ü irâdesine gerden-bend-i ittibâʿ etdikden sonra, Saydâ Eyâleti'ni taleb ve teşvîş-i havâtır-ı [Ü4 264a] erkân-ı devleti [V 123a] îcâb eder baʿzı rumûz u kinâyât ile tervîc-i şevâyib-i şûr u şegab etmişidi. Eyâlet-i Şâm ve Saydâ ve Trablus ânifen zikr olunduğu vech üzere Haleb Vâlîsi Vezîr İbrâhîm Paşa'ya mukaddemce tevcîh olunup, Cezzâr Paşa'nın zemân-ı sâlifden berü cemʿ u ihtizân etdiği emvâl, Beytülmâl'e ʿâyid olduğundan, mevcûd u mektûmu zâhire ihrâc olunmak bâbında tarafına hitâben evâmir-i ʿaliyye ısdâr ve müteʿâkıben tarafına tesyâr olunup, İsmâʿîl Paşa Devlet-i ʿaliyye'nin tîğ-i siyâsetinden güzîrân ve derûn-ı mefsedet-meşhûnunda bu ʿukde-i düşvâr-güzâr mestûr u pinhân olup, ʿuhdesine ednâ bir sancak tefvîzi câyiz olmadığı zâhir ü ʿıyân ise dahi, berây-ı maslahat te'lîf ü tatyîbine mübâşeret lâzım gelmekle, ʿAkkâ'dan hurûc ve Cezzâr Paşa'nın emvâline ʿadem-i taʿarruz ile izhâr-ı haslet-i inkıyâd u itâʿat eylediği hâlde, Vezâret'i ibkā ve Anadolu'da matlûbu olan eyâlet ile hakkında şîme-i ʿâtıfet icrâ olunacağından başka, tebaʿât-ı sâbıkası katʿâ lisâna alınmayup, sâyir vüzerây-ı ʿizâm gibi ilâ-mâ-şâ'allah devr-i menâsıb ve tahsîl-i merâtib eyleyeceği, makām-ı Sadâret'den işʿâr ve kapusunu tanzîm zımnında Cezzâr Paşa muhallefâtından elli bin guruş ʿatıyye olarak, tarafına teslîm olunmak husûsu dahi zebân-âver-i tekrâr kılınup, hakkında min-gayr-i istihkāk zuhûr eden merhamet ü işfâkın kadrini bilmeyüp, izhâr-ı ʿukūk u şikāk eylediği takdîrde, darben ve kahren ʿAkkâ Kalʿası teshîr ve aʿvân ü ensârı şemşîr-i kazâ [V 123b] -te'sîr-i [Ü4 264b] Şâhâne ile ifnâ vü tedmîr kılınacağı ifade vü tahrîr olunduğundan gayri, cereyân eden irâde, Şâm Vâlîsi nasb olunnan müşârun ileyhe ifâde ve Kapudan Paşa dahi ʿacâleten Donanma-yi hümâyûn ile o tarafa taʿyîn ve yedine verilan taʿlîm-nâmede tasrîh u tebyîn olunduğu vech üzere İsmâʿîl Paşa her vechile te'mîn olunup, itâʿat eylediği sûretde mashûben bi's-selâme Anadolu'ya ihrâc olunmak ve inkıyâdı haberi vârid olduğu hîn, matlûbu olan mansıb ile kâm-bîn olacağı ifhâm olunmak ve râyiha-i muhâlefet istişmâm olunduğu hâlde, min-ciheti'l-berr Şâm Vâlîsi ve min-ciheti'l-bahr Kapudan Paşa muhâsaraya âgāz ile kalʿa-i Pâdişâhî'yi bâgī-yi mezkûr yedinden istirdâd u istihlâs etmek keyfiyyâtı te'kîd ve her tarafa irsâl-i berîd kılındığından fazla, ahad-i emreynin kangısı mütehakkak olursa, ber-vech-i istiʿcâl haberi îsâl olunmak bâbında ısdâr-ı misâl kılındı.