Bâlâda beyân olunduğu vech üzere Vezîr Cezzâr Ahmed Paşa ʿuhdesinde olan Şâm ve Trablus eyâletleri intizâʿ olunup, Haleb Vâlîsi Vezîr İbrâhîm Paşa'ya tevcîh ve münhall olan Haleb Eyâleti'yle müşârun ileyhin mahdûmu Mehmed Bey'in kadr ü iʿtibârı bâ-Rütbe-i Vezâret iʿlâ vü tenvîh kılındığı evânda, Cezzâr Paşa'nın işbu Muharremü'l-harâm evâhırında vefât etdiği haberi vâsıl ve hayâtında üzerinden Şâm Eyâleti'nin insırâfından baʿzı sâde-dilânın îrâd eylediği mahzûr tabʿan müntefî vü zâyil oldu.