Eyâlet-i mezkûreye Vâlî olan Vezîr Mehmed Paşa'nın dâiresinde kesret ve mesârıfı bâliğ-i serhadd-i gāyet olduğuna binâ'en, Sivas ehâlîsi müşârun ileyhi istiskāl ve idâre-i umûru zımnında zulm ü teʿaddîye tesaddî eylediğini bess-i şekvâ ile tafsîl ü icmâl etmeleriyle, şikâyetleri baʿzı vesâyit ile müsmir ve hakkında tehevvür ü gazab-ı Şâhâne müstekarr olup, şeref-yâfte-i sudûr olan hatt-ı hümâyûn mûcebince defter-i vüzerâdan kaydı terkīn ve Tokad Kalʿası'nda îvâ vü temkîn olunup, müşârun ileyhe bu haber-i hâyil vâsıl olduğu hengâm, emr-i ʿâlî-şâna imtisâl ve me'mûr olduğu mahalle ʿazm ü şitâb ile muntazır-ı ʿafv-ı Şehriyâr-ı hamîde-hısâl oldu.