[Ü4 252b] Üç sene mukaddem İstanbul Kadısı olan Emîn Paşa-zâde Mehmed Emîn Beyefendi, taʿdîl-i evzân ve muhâfaza-i esʿâr ile tamaʿ-kârân-ı ehl-i sûku dem-beste vü sergerdân edüp, fukarâ' vü zuʿafâdan Şehriyâr-ı ʿadâlet-âsâr hazretlerine celb-i hayr-ı duʿâ ve hattâ bu mukābelede Anadolu Pâyesi'ne irtikā etmişidi. Halefleri kemâl-i cübn ü rehâvet ve belki baʿzı ʿillet-i hafiyyeye mebnî ihtiyâr-ı teʿazzüz-i nefs ü gaflet edüp, bu takrîb müşârun ileyhin tertîbine îrâs-ı halel ve ehl-i sûk istedikleri gibi beyʿ u şirâda izhâr-ı envâʿ-ı hiyel eyledikleri emr-i maʿlûm ve İstanbul Kadılığı'na bi-hasebi't-tertîb müteheyyî olanlarda o istiʿdâd maʿdûm olduğuna binâ'en, müşârun ileyhin Kadılığını hemân zarûriyyât-ı vakt îcâb etmekle, işbu Zilhiccetü'ş-şerîfenin on beşinci günü mîr-i müşârun ileyhe İstanbul Kadılığı tevcîh olunup, umûrunda taraf-ı Saltanat'dan kemâl-i ruhsat erzânî ve İstanbul'a müttehî olan Benli-zâde ve ʿUşşâkī es-Seyyid Mehmed Saʿîd Efendi dahi, gurre-i Muharrem'den katʿ-ı pâye ile nâyil-i sürûr u şâd-mânî oldular. Fi'l-hakīka müşârun ileyhden esnâf makūlesi berg-i bîd gibi lerzân ve kable'n-nâs kimi taʿdîl-i mîzân ve kimi terk-i evtân havâdisiyle sâmiʿa-i küre-i esîri mel'ân eylediler. Her mâddede garaz ber-taraf olup, rüşvet ü bertîle meyl olunmadığı hâlde, o mâddenin kāyimi olan şahsa iʿânet-i Hakk ve teveccüh-i halk derkâr ve umûrunda teshîlât-ı Rabbâniyye zuhûr edegeldiği mücerreb-i erbâb-ı iʿtibârdır. Mîr-i müşârun ileyhin ʿiffet [Ü4 253a] ü nezâheti bi't-tecribe maʿlûm-ı kâr-âzmûdegân-ı zemân ve maʿarret-i irtikâbdan dâmen-çîn-i nefret olduğu, tahkīk-kerde-i erbâb-ı dikkat ü izʿân olup, hemm ü kasdı dahi terfîh-i ʿibâd ile Şehriyâr-ı vâlâ-nijâd'a celb-i duʿâ ve tahsîl-i senâ olmağla, inşâ'allâhü Teʿâlâ umûrunda muvaffak ve 'umûm nâsın hakkında hüsn-i tefe'ül eyledikleri hüsn-i hidemât muhakkak olacağı zâhirdir.