Şehr-i Zilhicce'nin onuncu gicesi kānûn-i dîrîn-i devlet ve resm-i pîşîn-i Saltanat üzere Sadr-ı sütûde-makām ve Şeyhulislâm-ı benâm ve Anadolu Vâlîsi Vezîr Dâmâd ʿAlâ'eddîn Paşa ve Kapudân-ı deryâ ʿAbdülkādir Paşa ve sudûr-ı kirâm ve sâyir ʿulemây-ı aʿlâm ve ricâl-i devlet ve ʿumûmen Ocağlu ve sâyirleri Serây-ı hümâyûn'da infilâk-ı subh-ı sâdıka intizâr ile rü’yet-i cemâl-i bâ-kemâl-i Şâhâne'yi medâr-ı şeref ü iftihâr etmek arzûsunda olmalarıyla, nâ-gâh vakt-i bâm, burc-ı şerefden nûr-pâş-ı mefârık-ı enâm olup, neyyir-i hayyiz-i âsumân-ı Saltanat, kevkeb-i dürrî-yi felek-i şevket, zıll-i vârif-i Yezdân, sebeb-i emn ü emân-ı ʿâlemiyân, Sultân-ı selâtîn-i cihân, el-mahfûfu bi-ʿavârifi'l-Meliki'l-Mennân hazretleri Ak-ağalar Kapusu pîşgâhında mansûb-ı taht-ı fîrûze-baht-ı Cihân-bânî'lerine vazʿ-ı pây-i şevket ü iclâl ve kānûn üzere Nakībüleşrâf resm-i duʿâ vü senâyı ikmâl ʿakabinde ibtidâ Sadr-ı bâhirü't-temkîn, hâk-i kadem-i Şâhâne'ye vazʿ-ı cebîn ve sâyir vüzerây-ı ʿizâm ve erkân-ı Devlet-i ebed-kıyâm ʿalâ-merâtibihim dâmen ü âstîn bûs ile hurrem ü kâm-bîn olup, tehniye-i ʿîd icrâsından sonra, debdebe-i Mülûkâne ile Sultân Ahmed Câmiʿ-i şerîfi'ne tehzîz-i ʿinân-ı şevket ve baʿde-edâ'i's-salât Serây-ı dil-güşây-ı Cihân-dârî'lerine bi'l-yümni ve's-saʿâde ʿavdet ve zebh-ı karâbîn ile icrây-ı resm-i pîşîn buyurdular.