Şâm Kadısı Hammâmî-zâde Mehmed Râşid Efendi'ye Vezîr Cezzâr Ahmed Paşa kemâl-i ikbâl ü teveccüh izhâr ve mûmâ ileyhi Medîne-i münevvere Kazâsı ile mazhar-ı ferah u istibşâr eylediğinden başka, mansıbı olan Şâm Kazâsı'na üç mâh medd olunmasını recâ ve iltimâsına sûret-i müsâʿade rû-nümâ olmuşidi. Mûmâ ileyh ʿan-asl fazz u galîz ve mütehevvir bir kimse olup, gālibâ müşârun ileyhin mizâcına mugāyir tarafından bir vazʿ-ı bârid sâdır olmağla, ikbâl ü teveccühünü tagyîr ve meddi ilgā ve Medîne Kazâsı kaydı terkīn olunmak bâbında bu defʿa Devlet-i ʿaliyye'ye mahsûs ʿarîza tahrîr edüp, ber-muktezây-ı hâl iltimâsına müsâʿade olunup, Muvakkıtî [Ü4 252a] olan es-Seyyid ʿOsmân Efendi'ye kazâ'-i mezkûr on dokuz Muharrem'i gurresinden zabt olunmak üzere tevcîh ve bir ân akdem o tarafa hareketi tenbîh olundu.