Şevvâlü'l-mükerremin dördüncü İsneyn günü kānûn-i Devlet-i ebed-müddet üzere tevcîhât vukūʿ bulup, hademe-i Bâb-ı ʿâlî bi'l-cümle ibkā ve Küçük Tezkirecilik ile Rikâb Beylikcisi Muhibb Efendi'nin çerâğ-ı emeli pür-ziyâ kılınup, Defterdâr-ı Şıkk-ı Evvel ve Sânî ibkā ʿalâ-mâ-kân şerefiyle hurrem ü handân ve Hubûbât Nezâreti'yle sâbıkā Darb-hâne Nâzırı Ahmed Şâkir Efendi pâ-nihâde-i merkez-i ʿizz ü şân olup, Nişancılık, Reşîd Mustafa Efendi'ye ve Defter Emâneti, Râşid Mehmed Efendi'ye tevcîh ve Büyük Rûznâmecilik lutfen bu ʿAbd-i kemter'e ibkā olunarak, kadr-ı nâçizim beyne'l-etrâb tenvîh olundu. Baş Muhâsebecilik, Yazıcı-yı esbak Mehmed Efendi'ye ihsân-ı nevâle ve Şehr-emâneti, Dervîş Efendi-zâde'ye ihâle olunup, Tersâne-i ʿâmire Emâneti, Moralı Yûsuf Âgâh Efendi'ye tahvîl ve Matbah-ı ʿâmire Emâneti, Gümrükcü Hasan Ağa'ya kemâ-fi's-sâbık tahmîl olundu. Arpa Emâneti ile Süheyl Mehmed Efendi memnûn ve Bârût-hâneler Nezâreti ibkāsıyla Râgıb Efendi'nin sürûr u inbisâtı efzûn olup, Anadolu Muhâsebesi ile Arnabud Hasan Efendi nâyil-i hubûr u şâd-mânî [V 114b] ve Atlı Mukābeleciliği ile Âmedî-yi esbak Râkım Bekir Efendi feres-rân-ı meydân-ı kâm-rânî olup, Haremeyn Muhâsebeciliği, Divrikli Ahmed Efendi'ye nasîb u rûzî ve Yeniçeri Kitâbeti, ʿAvnî Efendi'nin bâʿis-i keşâyiş-i tabʿ-ı gamm-endûzu oldu. [Ü4 248a] Sipâh Kitâbeti ile Hâfız Mustafa Efendi mutayyeb ve Silahdâr Kitâbeti ile Bağdâd Kapu Kethudâsı Refî Efendi dest-zen-i sürûr u tarab olup, Cizye Muhâsebeciliği ile ʿAbdülkerîm Efendi dâmâdı Mehmed Efendi cezlân ve Mevkūfâtcılık ile Berber ʿAli Efendi melhûz-ı nigâh-ı Husrev-i devrân oldu. Masraf-ı Şehriyârî Kitâbeti mukaddemâ Cezzâr Paşa Kapu Kethudâsı Rüşdî Efendi'ye muvakkaten tevcîh olunduğuna binâ'en, kemâ-kân mûmâ ileyhe ibkā olunup, Mâliyye Tezkireciliği ile Tayfûr Efendi mesrûr ve Küçük Rûznâme ile İrfân-zâde'nin binây-ı ikbâli maʿmûr oldu. Sâyir menâsıb dahi ber-vech-i münâsib erbâbına tevcîh ve tevcîhâtdan hazz u nasîbleri olmayan hâcegân-ı Dîvân'ın ʿatâyây-ı Şâhâne ile hâlleri terfîh olundu. Vüzerây-ı ʿizâm hazerâtının dahi ekserîsi ibkā olunup, fekat Hanya muhâfazası, sâbıkā Mora Vâlîsi Vezîr es-Seyyid Mustafa Paşa'ya ihsân ve Mîr-i mîrân-ı kirâmdan baʿzıları hâllerine çespân elviye ile ferhân kılındı.