Rumeli Vâlîsi ve Serʿaskeri olan Vezîr Vânî Mehmed Paşa'dan dağlu eşkıyâsına dâ'yir bir maslahat-ı nâfiʿa vücûd-pezîr olmayup, ʿazlini zarûriyyât-ı vakt ü hâl îcâb ve bu hatb-ı ehemme dâ'yiresi muntazam ve celb edeceği asker emriyle kāyim bir Vezîr-i dilîrin taʿyîn olunmasını kâr-fermâyân-ı devlet istisvâb etmişler idi. İskenderiyye Mutasarrıfı Vezîr İbrâhîm Paşa'da mehâyil-i rüşd ü reviyyet bedîdâr ve ʿale'l-husûs bu defʿa Mısır'a me'mûr kılınacağı tarafına telmîh ü işʿâr olundukda, ʿarz-ı şevk ile kemâl-i inkıyâd izhâr eylediğinden başka, iklîm-i Mısır'a dâ'ir kaleme aldığı tedbîr, teslîm-kerde-i sagīr u kebîr olup, her hâlde fermân-ber-i devlet ve hayr-hâh-ı Saltanat olduğu tahkīk olunmuşidi. Umûr-ı Mısrıyye kesb-i sühûlet eylediğinden, me'mûriyyeti te'hîr u ilgā ve müşârun ileyh hakkında hüsn-i zann-ı Şâhâne rûnümâ olup, bu def'a Rumeli'nin inhilâli tekarrur ve müşârun ileyhe rabt-ı peyvend-i teʿalluk eden askerî tâyifesi dağlı eşkıyasıyla mü'telif olmayup, her hâlde o fırka-i bâgıyeden izhâr-ı teneffür eyledikleri hasebiyle, Rumeli'nin hasran tarafına tevcîh olunmak müzâkeresi erkân-ı devlet miyânında tekerrür [V 112b] edüp, müşârun ileyhden bu keyfiyyet istimzâc olundukda, birkaç seneden berü dağlı eşkıyâsının Rumeli memleketinde kâr-bend-i cesâret oldukları [Ü4 246a] şekāvet-i gûnâ-gûn müşârun ileyhe dâğ-ı derûn olup, Rumeli Eyâleti tarafına tevcîh olunduğu hâlde, bu emr-i ehemme bezl ü cûd ve sarf-ı bûd ve ne-bûd eyleyüp, fazl-ı Bârî ve yümn-i himem-i hazret-i Tâc-dâri'yle memleket-i mezbûreyi hey'et-i asliyyesine ircâʿ ve zaleme vü eşkıyâ hakkında tehdîdini îkāʿ eyleyeceğini tahrîrât-ı mahsûsasıyla tafsîl ü işbâʿ etmişidi. Müşârun ileyhin tavr u hareketinden âsâr-ı sadâkat ve bu maslahatda ibrâz-ı me'âsir-i merdânegî vü celâdet eyleyeceği istidlâl olunduğuna binâ'en, hufyeten Rumeli Eyâleti, Ser-askerlik inzımâmıyla tarafına tevcîh olunup, o havâlî ile münâsebeti tâmmesi olan Sadrıaʿzam hazretlerinin Kapucular Kethudâsı Memiş Efendi'yle tevcîh emr-i şerîfi irsâl olunup, kûze-i hâfızasına her keyfiyyet tevdîʿ ve Haremeyn Muhâsebeciliği pâyesiyle kadri terfîʿ olunmuşidi. Mûmâ ileyh sürʿat-i seyr ile İskenderiyye'ye pâ-nihâde ve sûret-i me'mûriyyetini ifâde ile habere gûş-dâde oldukda, müşârun ileyh fi'l-hâl icrây-ı resm-i istikbâl ve emr-i ʿâlî-şânı ʿalâ-mele'i'n-nâs kırâ'at ile duʿây-ı bekāy-ı ʿömrü şevket-i Şâhâne'yi târem-i eflâka îsâl edüp, kemâl-i şevk u hâhiş ile maslahata mübâşeret ve etrâf u eknâfa bu peyâm-ı hayriyyet-encâmı işâʿât eylediğinden gayri, üç bin kadar süvârî ve piyâdeye Mîr-i mîrân'dan Süleymân Paşa'yı Başbûğ nasb u taʿyîn ve İskenderiyye'den [V 113a] bizzat hareketine dek Edirne ve ol havâlîyi gezend-i eşkıyâdan te'mîn etmelerini tavsiye vü telkīn edüp, Paşa-yı mûmâ ileyhe medâr-ı nüfûz u iʿtibâr olmak içün [Ü4 246b] Köstendil Sancağı tevcîh buyurulmasını niyâz u istidʿâ ve tedârükü vüsʿünden hâric olan mühimmât ve sâyir edevâtın tanzîm ü irsâliyle nüfûz u istiklâlinin muhâfazasına müsâʿade-i seniyye erzânî kılınmasını bu defʿa tahrîr u inhâ edüp, müşârun ileyhin der-ʿakab icrây-ı me'mûriyyete berzede-dâmân-ı gayret olması hakkında olan hüsn-i zannı te'kîd ve teveccüh-i devleti tecdîd edüp, ʿunfuvân-ı me'mûriyyetinde niyâz-mend olduğu husûsu isʿâf, istiklâlini muhâfaza nevʿinden olduğuna binâ'en, keyfiyyet hâk-i ʿatebe-i Mülûkâne'ye ʿarz u îzân ve tahsîl-i ruhsat ʿakabinde Paşa-yı mûmâ ileyh Köstendil Sancağı'yla hurrem ü şâdân kılındı. Vezîr-i müşârun ileyh bende ve bende-zâde-i devlet olduğuna binâ'en, bu me'mûriyyeti medâr-ı iftihâr ve ser-nâme-i ʿizz ü iʿtibâr ʿadd edüp, kemâl-i gayret ü ihtimâm ile ser-rişte-i maslahata teşebbüsü inşâ'allâh dağlı eşkıyâsının bi'l-külliyye izmihlâlini ve Rumeli halkının nizâm-ı ahvâlini müstevcib olup, reʿâyâ âsûde-nişîn-i mazalle-i itmi'nân ve memâlik-i Pâdişâhî vâreste-i mazarrat-ı ehl-i husrân olacağı eltâf-ı İlâhîyye'den müstebʿad değildir. Mukaddemâ balkānın berü ve öte tarafından taʿyîn olunan asker şimdiye dek i'mâllerine kādir bir Serʿasker'e muvaffak olamadıklarından, ekser-i ahyânda eşkıyâya mağlûb ve müstedricen vukūʿ bulan savletlerinden mer'ûb olmalarıyla, eşkıyâ üzerine varmayacakları meczûm [V 113b] ve miyânelerinde zü'l-vecheyn kimseler dahi mevcûd olduğundan, zaferden me'yûs oldukları ma'lûm olup, Rumeli Vâlîsi ve Serʿaskeri nasb olunan Vezîr İbrâhîm [Ü4 247a] Paşa'nın askeri taht-ı râbıtada olmağla, mahkûmiyyet-i mutlakaları nümâyân ve gürûh-ı bugāt ile ihtilât etmeyüp, emr ü nehy-i müşârun ileyhe gerden-dâde-i inkıyâd olacakları karâyin-i hâliyye ile zâhir ü ʿiyân olup, ʿavn-i Kahhâr-ı Müntakım ile bu defʿa zümre-i eşkıyânın bîh-ı şecere-i melʿûne-i tesallutları berkende-i tîşe-i intikām ve cümlesi mânend-i evrâk-ı hazân mütesâkıt-ı zemîn-i zevâl ü inʿidâm olacakları ümmîd-kerde-i hâss u ʿâmdır.