Bundan akdem zikr ü beyân olunduğu vech üzere Manav İbrâhîm ve mel'anetinde merkūma kafâdâr u sehîm olan haşerâta Tirsinikli-zâde tarafından emân verilüp, muktezây-ı vakt ü hâle nazaran sebkat eden ihânetlerinden iğmâz ve icrây-ı mâ-yelîklerinden şimdilik iʿrâz olunmuşidi. Tâʾife-i mezkûreye birkaç seneden berü tereffüh ve celb-i mâl, ʿâdet ve envâʿ-ı füsûk u fücûr, tabîʿat olup, Tirsinikli-zâde'nin vüsʿünden hâric olacak derecelerde ikrâm u ʿatâyâtına kānî olmayup, her hâlde metbûʿ u mahkûmu olmakdan ibâ ve bir behâne ile kemâ-kân reh-gîr-i vâdî-yi bağy ü şekā olmak fikrini kulûb-ı kāsiyelerinde ihfâ eylediklerini, Tirsinikli-zâde baʿzı [Ü4 238b] mahalle inhâ edüp, dâyimâ müterassıd-ı fursat ve izâlelerine kemer-bend-i gayret olmuşidi. Havene-i mezkûreden şurûta muğâyir fesâdât-ı külliyye [V 107a] bâriz ve ıslâhlarından mûmâ ileyh der-mânde vü ʿâciz olup, Manav İbrâhîm'i bir takrîb dâm-gâh-ı ʿakl ile sayd ve nûk-i şemşîr ile defter-i küştegâna kayd edüp, ser-i maktûʿunu irsâl ve hevâdârlarını dahi istîsâl etmek üzere olduğunu maʿrûz-ı Südde-i ʿadâlet-iştimâl etmişidi. Birkaç gün murûrunda sâyir ruʾesây-ı eşkıyâyı bulundukları mahallerde ele getürüp, üzerlerine havâle-i tîğ-i âteş-bâr ve nâmdârlarından kırk nefer hazeleyi galtân-ı hûn-i katl ü demâr edüp, ru'ûs-i maktûʿalarını işbu Ramazân-ı şerîf gāyetinde Âsitâne'ye tesyîr ve böyle bir hıdmet-i ʿazîme ile hakkında olan iltifât-ı Devlet-i ʿaliyye'yi tevkīr eyledi. Ru'esây-ı merkūmenin hevâdârları olan eşkıyâ birer mahalde tehassun u ihtifâ eylediklerine binâ'en, üzerlerine her cânibden asker havâle ve anlar dahi fazl-ı Hakk ile karîben i'dâm ü izâle olunacağlarını mutazammın mûmâ ileyh ʿatebe-i felek-mertebeye takdîm-i ʿarîza vü kabâle eyledi. “Bâdâ hemîşe düşmen-i devlet çünîn helâk”