Bosna hudûdunda vâkiʿ Bihke Kalʿası'na iki sâʿat mesâfe olan bir mahalle hevâdan ʿazîmü'l-cüsse bir çâdır sâkıt olup, ehâlîden baʿzı kaviyyü'l-kalb kimseler yanına vardıkda, kimi “Alâmet” ve kimi “Eser-i kıyâmet” deyerek bir maʿnâ veremediklerinden, sûret-i hâli Bosna Vâlîsi Vezîr Ebûbekir Paşa'ya iʿlâm ve ol dahi Efrenc tâʾifesinin kuvvet-i eczâ ile itâre etdikleri hayme olduğunu ifhâm etdiyse dahi, Bosna ehâlîsi o makūle şeyʾi idrâkdan ʿâciz ve evhâm u hayâlâta tebaʿiyyet ile miyânelerinde güft-gû hâdis ü bâriz olduğunu bir kıtʿa kāʾimesinde derc ve hayme-i mezkûreyi Travnik'e celb ve hakīkatini reʾye'l-ʿayn ehâlîye irâʾe ile defʿ-i herc ü merc edeceğini meʾâl-i tahrîrâtına mezc eylemiş. Cism-i mezkûr tâ'ife-i Efrenc'in karîbü'l-ʿahdde imdâd-ı eczâʾ-i hevâʾiyye ile ihtirâʿ etdikleri hayme-i tayyâr olduğuna fî-bâdiyyi'l-emr ʿakıl delâlet etdiyse dahi, hem-hudûd olan düvelden Nemçelü'ye bu keyfiyyet işʿâr ve: “Bu hilâlde hudûda karîb mahallerden [Ü4 238a] hayme-i maʿhûde itâre olundu mu?" deyü istifsâr olundukda, [V 106b] İtalya Ülkesi'nde vâkiʿ Boloyna Şehri'nde hükemây-ı Efrenc'den baʿzıları “Kebîr Balone” taʿbîr olunan kürreyi sanʿat-ı maʿhûde ile ber-hevâ edüp, iki nefer âdem dahi kürreye merbût olan sandala binüp, beraber tayerân eylediklerinde, Venedik Körfezi'nde Ankona pîşgâhında sandal ve balone deryâya nâzil ve fi'l-hâl baloneye merbût hablı katʿ ve kasd-ı sâhil eyledikleri hâlde, Nemçe sefînelerinden birine keyfe-me'ttefeka rast gelüp, mezbûrlara imdâd ve sefîneye isʿâd eylediklerinde, zikr olunan baloneye hiffet ʿârız olup, tekrâr cevv-i hevâya suʿûdunu ve giderek Bihke kurbuna sukūtunu tercemânlar tefhîm ve vakʿa-i mezkûrenin baʿzı keyfiyyetini ʿakl-i müstakīm erbâbı teslîm ve baʿzısını muhâle taʿlîk ile râvîsini telvîm eylediler.