Müşârun ileyh bir müddetden berü mübtelâ olduğu ʿillet-i zehîr ile dem-beste-i çâr-mevce-i inkılâb ve Ak-deniz'den ʿavd ü iyâbında keştî-i vücûdu sergerdân-ı girdâb-ı renc ü ıztırâb olup, zaʿf u hüzâlı yevmen-fe-yevmen müterakkī vü mezîd ve taleb-i sâhil-i sıhhat ile şeb ü rûz mıkzâf-zen-i saʿy ü ihtimâm olan gürûh-ı etibbâ, [mısra]: Devây-ı merg ne-şinâsed eger başed kesî Lokmân mefhûmunca ihtiyâtdan güsiste-târ-ı ümmîd olup, ʿâkıbet mâ'ü'l-hayât-ı ʿömr-i girân-mâyesi meyl-kerde-i semt-i rüsûb ve Şaʿbânü'l-muʿazzamın yirmi üçüncü Çehârşenbih günü kubeyl-i mağribde necm-i tâb-dâr-ı zindegânîsi nühüfte-i tahte's-sehâb-ı gurûb olup, civâr-ı hazret-i Hâlid'de nühüfte-i zîr-i türâb ve tahkīk-kerde-i sırr-ı “Li-külli ecelin kitâb” oldu.