Gürûh-ı Havâric'in semt-i Hicâz'a tesallut u hücumları hasebiyle müdâfaʿaları kaydında olanların zâd ü imdâd ile takviye-i bâzû-yı iktidârları bahran Mısr-ı Kāhire'ye münhasır olup, fitne-i Arnabud ve ümerâ ile bu maslahatın husûlü müteʿazzir ve Havâric dağdağası var iken Mısır'ın nizâmına tevakkuf eden küllî tertîbâtın kuvvetden fiʿle îsâli zâhir-i hâle nazaran gayr-i müteyessir olmağla, ümerâyı te'mîn ü iğfâl ve vakt-i ferâğ u vüsʿatde satvet-i kāhire-i Saltanat-ı seniyye ile mezbûrları pây-mâl-ı kahr u nekâl etmek tedbîri, erkân-ı devlet miyânında râbıta-bend-i istikrâr ve baʿzı şurût ile cünhaları ʿafv olunup, ol bâbda lâzım gelen emr-i celîlü'l-iʿtibâr, Mısır Vâlîsi olup, el-yevm İskenderiyye'de mukīm Vezîr ʿAli Paşa tarafına tesyâr olunmuşidi. Emr-i ʿâlî vusûlünden mukaddem ümerânın müşârun ileyh ile muhâbereleri vukūʿ bulup, şöyle ki, iki yüz kadar etbâʿ ile Mısır'a dâhil [Ü4 234a – V 105a] olup, Arnabudlar'ın taʿyînâtları beyler tarafından verilmek ve gümrükler ve sevâhil ve bâ-husûs İskenderiyye taraflarından zabt olunup, vülât ancak mahlûlâtdan ʿâyid şey' ile teʿayyüş etmek şurûtunu îrâd etmişler idi. Teklîfâtları ʿayn-i hıyânet ve garazları zabt-ı memleket ve icrây-ı ʿukūk u ihânet olduğundan, mebʿûsları müşârun ileyh tarafından redd ve derîce-i mefsedetleri sedd olunup, İskenderiyye muhâfazası ile dâmen-çîn-i iştigāl ve müterassıd-ı encâm-ı hâl olmuşidi. Emr-i mezkûr yedine vusûl buldukda, kıyâsdan bîrûn hazâyin ü defâyin sarfıyla istihlâs olunan iklîm-i Mısır, ümerâ dedikleri süfehâ yedine tekrâr teslîm ve vüzerây-ı ʿizâm zîr-i tehakkümlerinde mübtelây-ı belây-ı ʿazîm olarak icrây-ı ahkâm-ı Sultânî'den ʿâciz ve bi'z-zarûre hevâlarına tebaʿiyyet lâzım geldiği emr-i zâhir ü bâriz olduğundan, emr-i mezkûru ihfâ ve bir müddet tevkīfını evlâ görmüşidi. Bu esnâda hâssiyyet-i hâk-i Mısır iktizâsıyla Arnabudlar'ın bir sebeb ile dîk-i mefsedetleri galeyân ve Şeyhu'l-beled İbrâhîm Bey hânesi fî-tarfeti'l-ʿayn yağmâ vü tâlân ve bu cihetle tarefeyn birbirinden selb-i emniyyet ve ahadühümâ âhara izhâr-ı rûy-i dürüştî vü muhâsamet edüp, müşârun ileyhin maʿiyyetine me'mûr Bin-başı Kara Mustafa dahi eşkıyâ gürûhuyla ʿarbedeye hâhiş-ker ve hâh u nâ-hâh izin alup, Demenhûr'a doğru sevk-ı leşker ve bu günlerde muhârebeye mübâşeret eyleyeceğini müşârun ileyh tahrîr ü işâret eyledi.