Tîmûr Paşa, Bağdâd Vâlîsi müteveffâ Vezîr Süleymân Paşa merhûmun berkeşîdesi olup, niyâz u ilhâhına mebnî Vezâret'e nâyil olmağla, bu râbıta bi'l-verâse halefi olan ʿAli Paşa ile mürtebit olmak zannıyla müşârun ileyhin tebeʿât-ı sâbıka ve mezâlim-i lâhıkası Bağdâd Vâlîsi'yle bu defʿa müzâkere ve iʿdâmı husûsu müşâvere olunup, zulm ü gadrini işbâʿ ile izâlesini ol dahi tecvîz ü tasvîb ve maʿiyyetine me'mûr kılındığı hâlde sühûletle cezâsını tertîb edeceğini tahrîr etmişiken, Âl-i ʿUbeyd'in bu cesâretini takbîh ve o makūle efrâd-ı nâsın iʿdâmı irâde olunursa bile, vüzerâya havâle olunmasının evleviyyetini tasrîh ile bi'n-nefs ʿaşîret-i merkūme üzerine hareket eyleyeceğini telmîh eyledi. Müşârun ileyh Dirʿiyye Serʿaskeri [V 104b] nasb olunup, Havâric'in defʿ-i tesallut ve istîsâllerine [Ü4 233b] me'mûriyyeti pey-der-pey Devlet-i ʿaliyye tarafından işʿâr u tafsîl ve tertîbât ve vücûh-ı sâyire ile bâzû-yı iktidârına kuvvet verilerek hareketi taʿcîl olunur iken, bu hatb-ı cesîmi taʿtîl ile Rakka tarafında mukīm Âl-i ʿUbeyd üzerine ʿazîmet ihtiyâr eylemesi, kemâl-i televvününü iʿlân ve vâcibât-ı dîniyyeden olan umûr-ı mütehattimü'l-iʿtinâyı terk ü mugādere ile gayret-i mecʿûleden münbaʿis bir emr-i yesîrin temşiyyeti zımnında ifnây-ı vakt ü zemân eylemesi, erkân-ı devleti vâlih ü hayrân eyledi.