Diyâr-ı Bekir ehâlîsi maktûl Hüseyin Paşa'dan gördükleri gadr u zulm hasebiyle birbiriyle ittifâk ve fîmâ-baʿd şedîdü'ş-şekîme vüzerâyı kabûl etmemek üzere miyânelerinde rabt-ı ʿahd ü mîsâk etmişler idi. Müteveffâ Zühdî Paşa'nın dâyiresi gayr-i kesîf ve kendüsinin me'ûneti gâyet hafîf olmakdan nâşî, vefâtına dek müteʿayyinân-ı memleket ne hâl ise müşârun ileyh ile safka-zen-i i'tilâf ve dâyiresini ber-vech-i kifâf [Ü4 232b] idare edecek hıdemât ibrâzıyla sûret-nümây-ı dâd ü insâf olup, halefi Vezîr Mehmed [V 103b] Paşa'nın dâyiresi muntazam ve sevret ü batşı ʿunvân-ı hâlinden münfehim ise de, ʿan-asl gars-ı yemîn-i hazret-i Sadâret-penâhî olup, fikr-i encâm-ı hâl ile mukaddemâ beynlerinde münʿakıd olan vifâk u visâk karîn-i inhilâl ve müteneffisân-ı vilâyât müşârun ileyhi merhale-be-merhale istikbâl edüp, şehre duhûlünde kelânterân-ı memleketi refte refte te'dîb ve ʿulemâ ve sulehâ ziyyinde bulunanlarını diyâr-ı baʿîdeye tağrîb edüp, nizâm-ı memlekete me'mûr olanlardan bî-cürm kimselere ʿamden ev sehven cevr ü teʿaddî mesbûk bi'l-misl olduğundan, gâlibâ mazlûmlardan birinin sehm-i duʿâsı karîn-i hedef-i icâbet olup, bu sebeble müşârun ileyhin ekser etbâʿı hummây-ı rediyye ile bî-mecâl ve baʿzısı dârü'l-mücâzât olan âhırete reh-peymây-ı istiʿcâl oldu. Müşârun ileyh dahi zâhirde hevây-ı Âmid ile ʿadem-i imtizâc ve emrâz-ı gûnâ-gûn ile zebûn-ı ser-pençe-i iztırâb u inziʿâc ve ednâ bir mansıb ile ʿazlini niyâz ve bu keyfiyyeti ʿarz-ı huzûr-ı Sadr-ı bende-nevâz etmekle, evâyil-i Şaʿbânü'l-muʿazzamda ʿazl ve Sivas Eyâleti'ne vasl olundu. Rakka Vâlîsi Vezîr Tîmûr Paşa'nın ahvâli mukaddemâ güzârende-i kilk-i beyân ve deşt ü beyâbânda geşt ü güzâr ile memleketin Vâlî'den huluvvü zâhir ü ʿıyân olup, te'lîfi mümteniʿ ve kuvve-i vâhimesi gayr-i mündefiʿ olduğundan başka, bu esnâda o havâlîde mütemekkin ʿaşâyir-i kesîretü'ş-şuʿûbdan Âl-i ʿUbeyd ve anlara mutâviʿ sâyir kabâ'il, müşârun ileyhin üzerine [V 104a] hücûm ile emvâl ü eşyâsını yağmâ ve kendüsini firâr ve hezîmete ilcâ etmeleri [Ü4 233a] hasebiyle, eyâlet-i mezkûreye bir Vâlî nasb olunmak, mûcibât-ı vakt ü hâlden olup, bu defʿa Sivas'dan ʿazl olunan Vezîr Veliyyüddîn Paşa'ya Diyarbekir Eyâleti ilhâkıyla Rakka Eyâleti tevcîh ve ne vechile hareket eyleyeceği me'mûriyyet emrinde tarafına mü'ekkedden sipâriş ü tenbîh olundu. İç-il Sancağı'na ber-vech-i arpalık mutasarrıf olan Vezîr es-Seyyid Mehmed Paşa, kazâ-zede vü mağdûr ve bir eyâletle kayırılması matlûb-ı hazret-i Sadru's-sudûr olduğuna binâ'en, hakkında tahrîk-i silsile-i merhamet ve şefekat-i hazret-i Şehriyârî kılınup, ol dahi ber-vech-i ilhâk Adana Eyâleti'yle mesrûr ve seng-i hâdisât ile rahne-dâr olan hâtırı mecbûr kılındı.