sebeb-i füzûnî-yi keder ü melâli olmakdan nâşî, bir cihetle tatyîbi havâlî-kerd-i kulûb-i ekâbir ü eʿâlî ve evvel ü âhır neyl ü vusûlüne tehassürü zâhir olan Tırhala Sancağı şehr-i Receb'in yirmi altıncı günü ber-vech-i ilhâk tarafına tevcîh olunup, mutasarrıf-ı sâbıkı Vezîr Bilâslı Mehmed Paşa dahi Ohri Sancağı'yla te'lîf ve hall-i İlâhî vukūʿunda nemâdâr bir mansıb ile tatyîb olunmak vaʿdiyle taltîf olundu. Burusa Kazâsı, on dokuz Muharrem'i gurresinden zabt etmek şartıyla sâbıkā Galata Kadısı Uşşâkī-zâde es-Seyyid ʿAbdülhâlık Efendi'ye ve Şâm-ı şerîf Kazâsı, Kuds-i şerîf'den munfasıl es-Seyyid ʿOsmân Efendi'ye târîh-i mezkûrda mutasarrıf olmak üzere tevcîh ü ʿinâyet ve Hâmise Rütbesi'nde olan mahdûm-ı hazret-i [Ü4 230b] Fetvâ-penâhî Mustafa Hüsâmeddîn Efendi şehr-i Rebîʿulevvel'in on dokuzundan tasarruf etmek üzere Galata [V 101b] Kazâsı ile manzûr-ı ʿayn-i re'fet ve bu târîhde Halebü'ş-şehbâ Kazâsı ile Dervîş Paşa İmâmı Mehmed Efendi dahi dest-nevâzende-i mekremet kılındı.