Dirʿiyye Serʿaskeri nasb olunan Bağdâd Vâlîsi Vezîr ʿAli Paşa, me'mûr olduğu maslahat-ı mühimmenin te'diyesinde küllî suʿûbet ve mezîd ʿusret îhâm ve hareketini tâkat gelmeyecek mühimmât ü edevâtın tedârük ü tehiyyesine inhisâr ile kāyimesinde hadd ü edebden hâric kelimât-ı lâgıyeye ikdâm etdikden sonra, evâhır-ı Cumâdelâhıre'de Vehhâbîler üzerine hareket üzere olduğunu sûret-i tenâkuzda ʿarz u iʿlâm etmişidi. Müşârun ileyh husûl-i merâmına dek Devlet-i ʿaliyye'ye izhâr-ı temelluk ü istizlâl ve nâyil-i merâm olduğu hengâm, Vezâret'e müstehakk olan muʿârızlarını birer sûretle defʿ ve ʿakībinde ibrâz-ı şîve-i nâz u delâl etdiği her ne kadar zâhir-i hâl ise dahi, li-maslahatin tarîka-i [Ü4 230a] enîka-i iğmâz u tecâhüle sülûk [V 101a] iktizâ edüp, taraf-ı müstecmiʿü'ş-şeref-i hazret-i Sadâret-penâhî'den her su'âline müskit cevâb ve her iʿtirâzına müdellel ʿitâb îrâd olunup, takviye-i bâzû-yı iktidarı zımnında müteʿahhid olduğu muhallefât bedelinden ve Bağdâd İrsâliyyesi mâlından işbu sefere harc etmek üzere me'zûn ve Bağdâd'dan piyâde tahrîrinin imkânı tarafından ʿarz-ı südde-i Cihân-bânî kılınmış olduğuna binâ'en, o tarafdan beş kadar Bin-başı tertîb etmek üzere lâzım gelen mebâliği, İngiliz Elçisi maʿrifetiyle poliçe olunup, hareketini mûcib olacak tergībât gereği gibi icrâ ve bu mâdde-i cesîmede kemâl-i gayret ile bezl-i vücûd ve sarf-ı bûd ve ne-bûd eylemesi tarafına inhâ olundu.