Memleket-i mezbûre aʿyânları bu husûsa me'mûr vüzerây-ı ʿizâm hazerâtından müsteşʿir ve havf-ı mu'âhaze vü izrâr ile mütevahhiş ü mütezaccir olduklarına binâ'en, Rumeli, sehlü'l-kıyâd ve me'mûnü'l-gāyile bir Vezîr-i nasâfet-semîr'e tevcîh ü ihâle olunup, dûrdan nezâret ve bi'l-muhâbere te'diye-i maslahat eylediği takdîrde, hânedân-ı Rumeli ʿavn-i Hakk ile bu dâhiye-i dehyâyı bi'l-külliyye izâle eyleyeceklerini müşʿir Südde-i saʿâdet'e irsâl-i ʿarîza vü kabâle etmişler idi. Re'y-i mezkûr müstasveb-i evliyây-ı umûr olduğuna binâ'en, Rumeli Eyâleti bâlâda tasrîh olunduğu vech üzere Vezîr Tebedelenli ʿAli Paşa ʿuhdesinden fekk ve Vezîr Vânî Mehmed Paşa'nın fass-ı me'mûriyyetine hakk olunup, müteʿahhidler dahi tahsîl-i itmi’nân-ı bâl ile tedmîr-i aʿdâya iştigāl üzere olmuşlar idi. “Manav İbrâhîm” nâm şahs-ı küştenî tehassun içün sevâhil-i Tuna'da bir mahallin zabtını tehayyül ve fursat bulduğu hâlde Eflâk memleketine geçüp, nehb ü gāret ile reʿâyâya îrâs-ı vehn ü tezelzül etmek dâʿiyesiyle Tutrakan Kasabası üzerine hecme-endâz-ı gurûr [Ü4 228a] ve ehâlîsini zebûn-ı ser-pençe-i şürûr eylediğini [V 99a] Tirsinikli-zâde istimâʿ ve zîr-i livâsında ictimâʿ eden asâkir-i vâfire ile yetişüp, kasabanın etrâfında hendek ve meterisler ihdâs u ihtirâʿ edüp, Tutrakan'ın berü ve öte yakasında olan kayıklar dahi mukaddemce birer mahall-i me'mene çekilmiş olduğundan, eşkıyânın bir tarafı su ve âhar tarafları asker-i Pâdişâhî ile memlû olduğundan, hasr-ı küllî ile mahsûr ve top ve humbara ve tüfeng dâneleriyle ekseri niʿmet-i hayâtdan mehcûr ve bu hâl ile birkaç gün murûr edüp, nâ-çâr eşkıyâ istîmâna mecbûr olmalarıyla, Tirsinikli-zâde tarafından Manav İbrâhîm'e ve bakıyyetü's-suyûfa emân verilüp, dâyiresine celb olundukları ve o kolda olan gāyile fazl-ı Bârî ile ber-taraf olduğu haberi, resîde-i Südde-i saʿâdet ve hidmeti mukābili bu defʿa dahi mûmâ ileyh mükerrem ü mültefet oldu. Kara Feyzî dahi başında olan haşerât ile Filibe ve Pâzârcık etrâfında kemâ-fi'l-evvel nehb-i emvâl-i ehâlî ve şekāvet ü mazarratdan gayr-i hâlî olup, Siroz Aʿyânı Kapucu-başı İsmâʿîl Bey, üzerlerine hücûm edüp, cemʿiyyetlerini perîşân ve vâfirini küşte-i tîğ-i berrân edüp, bakıyyesi balkānın baʿzı saʿbü's-sülûk mahallerinden Sofya'ya aşdıkları ve bunların dahi sevret ü kuvvetleri zâyil olduysa dahi, bakıyyetü's-süyûf olan eşkıyânın istîsâl ü izmihlâlleri bâbında her tarafa müceddeden ısdâr-ı evâmir-i celîle kılındı. Fere Aʿyânı olup, Tokadçıklı'nın sadmesi sebebi ile dağlu gürûhuna iltihâk ve ol dahi bir tarafdan bilâd u kasabâtı âteş-i gadr ile ihrâk eden ʿAli Monla'nın dahi Fere'ye iskânıyla gāyilesi [Ü4 228b – V 99b] ber-taraf olmak kuvvetden fiʿle îsâl olunmuşiken, Tokadcıklı nâ-bekârı ser-dâde-i vâdî-yi nahvet ü ruʿûnet ve gayz-ı kadîmini icrâya mübâderet etmekle, lâ-cerem bir müddetden berü umûrunu ru'yet eden Tezkire-i Evvel-i sâbık Ahmed Bey, mezkûru ilzâm etmek, kezâlik ʿAli Monla'nın umûrunu idâre eden Sultân Bâyezîd Kâtibi, ʿAli Monla'yı Fere'de Aʿyân eylemek mesâlihiyle irsâl olunup, bu tedbîr dahi sûret-yâb-ı nizâm olmadığına binâ'en, me'mûrlar ʿavdet ve ifâde-i keyfiyyet eylediler. Bu maslahata me'mûr Sirozlu İsmâʿîl Bey ve sayir aʿyânların maʿiyyetinde ihtişâd eden asker, zâd u zahîre tedârükünde ʿacz-âver ve herkes memleketine ʿavd ü insırâfa muztarr olup, bu sûretde ru'esâ beşer onar âdem ile mütehayyir ü sergerdân kalup, hâllerini bu tarafa beyân ʿakabinde yerlü yerlerine revân oldular. Dağlu eşkıyâsı her tarafı hâlî bulup, Migalgara gibi bir sevâd-ı aʿzama cebren duhûl ve Kadı ve sâyir müteʿayyinlerini maktûl ve ekser mahallini sûzân ve ehâlîsini giryân eylediler. Eşkıyây-ı mezkûrenin fukarâ vü zuʿafâ üzerinden mazarratları defʿ olunmak bâbında bir Vezîr'in me'mûriyyetini zarûriyyât-ı vakt îcâb ve o havâlîde bulunan Selânik Mutasarrıfı Vezîr ʿOsmân Paşa bu defʿa maʿiyyetine me'mûr askeri istishâb edüp, mecmaʿ-ı eşkıyâ olan mahalle hecme-endâz-ı gayret ve Edirne Bostancı-başısı fekat Edirne'yi muhâfazaya bezl-i kudret etmek üzere iktizâsı üzere isdâr-ı evâmir-i ʿaliyye kılınup, her tarafa Tatar-ı serîʿu's-seyr tesyâr olundu.