Sene-i âtiyede Donanma-yi hümâyûn umûruna sarf [V 95b] olunmak [Ü4 224b] ve kısteyn mevâci[bi]nin sâbık u lâhıkının kesrini cebr ve müste'men tâyifesinden mübâyaʿa olunan mühimmâtın akçaları verilmek içün tasarrufât-ı ʿakliyye ile hâricden bir mikdâr îrâd tedârükü vücûb derecesine tevâsul ve bu maslahat-ı mühimmenin esbâb-ı husûlü erkân-ı devlet miyânında birkac defʿa tedâvül edüp, nukūd-ı meskûkenin ʿayârına iʿtibâren cizye-i şerʿiyyenin ednâsına on ve evsatına yirmi ve aʿlâsına kırk pâre zamm olunmak sâyig ve bu husûs muhdesât-ı umûrdan olmadığı rütbe-i tevâtüre bâliğ olup, ittifâk-ı ârâ ile Memâlik-i mahrûse'de vâkiʿ olan ehl-i zimmetin cizyelerine o mikdâr şey' zamm olunup, emtiʿa ve duhân gümrüklerine ber-vech-i Ocağlık ilhâk ve yüz kırk sehm iʿtibârıyla tâliblerine fürûht ve zamîme-i mezkûreden batıyyü'l-husûl farz olunan mebâliğ, beher sâl havâlâta tertîb olunmak husūsu maʿrûz-ı hâk-i ʿatebe-i Şehriyârî kılınup, bu vesîle ile ehl-i zimmete zulm olunmamak ve hâsıl olan mebâliği lâzım olmayan mahallere sarf olunmayup, umûr-ı mühimme ve müstaʿceleye tertîb olunmak üzere izn ü ruhsatı hâvî mufassal hatt-ı hümâyûn şeref-rîz-i sudur olup, ʿilm ü haberlerde beyân olunduğu şurût üzere zikr olunan eshâm husûsu, evâyil-i Recebü'l-ferdde karîn-i nizâm ve her sehmi beşer kîse fâyizden kırk kîse muʿaccele ile tâliblerine fürûht u iktisâm olunup, fi'l-hakīka der-dest olan umûr hasebiyle devlete târî olan müzâyakadan teneffüs hâsıl ve iʿmâl-i fikr-i bârîk ile müceddeden böyle bir cesîm îrâd, sâyir vâridât-ı devlete mutassıl oldu.