Mukarreb-i hazret-i Pâdişâhî ve müstağrak-ı niʿam-i nâ-mütenâhî olan Mâbeynci ve Kahveci-başı Rüstem Ağa çırağlığa tâlib ve tarîk-ı ʿulemâya duhûl ile ârzû-mend-i ecell-i merâtib olup, bu makūle kurb-i Pâdişâhî'de sıdk u istikāmetle îfây-ı lâzime-i hakk-ı hıdmet edenlerin incâh-ı mekāsıdlarına müsâʿade, şîme-i müstahsene-i Mülûkâne'den olduğu vâreste-i beyân ü ifade olmağla, mûmâ ileyhin niyâzı müsâʿafe-i hazret-i Cihân-dârî'ye karîn ve şerefyâfte-i sudûr olan hatt-ı hümâyûn-ı şevket-makrûn mûcebince Hâmise Rütbesi'yle min-aʿyâni'l-müderrisîn olup, birkaç gün sonra on dokuz senesi Cumâdelûlâ'sı gurresinde mutasarrıf olmak üzere Mekke-i mükerreme Pâyesi'yle Üsküdâr Kazâsı, Efendi-yi mûmâ ileyhe ʿinâyet olunup, bu takrîb memnûn-ı lutf-i vâlâ-yı Şehinşâh-ı İskender-himmet oldu. Efendi-yi mûmâ ileyhin çerâğ-ı emeli efrûhte kılındığına binâ'en, mahalli hâlî ve Hâne-i Hâssa'dan Mehmed Emîn Ağa, o hidmet-i refîʿa ile mahsûd-ı edânî vü eʿâlî olup, Ser-çukadâr-ı hazret-i Şehriyârî Mehmed Bey'in dahi Mâbeyncilik şerefiyle dürr-i semîn-i iʿtibârı girân-ı kadr u gâlî oldu.