Cumâdelâhıre'nin on altıncı İsneyn gicesi sâʿat-i leylî beş buçukda iken Evkātlı-oğlu Kapucu-başı Süleymân Bey'in İshak Paşa'da istîcâr etdiği hâneden âteş zuhûr edüp, hâne-i mezkûru ve o hizâda vâkiʿ büyûtu ihrâk ederek, Kabasakal Câmiʿi dîvârına müntehî olup, berü tarafdan dahi İshak Paşa Hammâmı'nı ve mukābilinde bulunan büyût u dekâkîni yakup, beş-altı sâʿat mümtedd ve iztırâb-ı nâs müştedd olmuşiken, o âteş-i serkeş zâyil ve Sultân Serâyı ve binâsı henûz kemâle resîde olmayan Cebe-hâne-i ʿâmîre'ye ʿinâyet-i Sübhânî hâyil oldu. Birkaç [Ü4 223b – V 94b] defʿa ʿalâ't-teʿâkub Cebeci hudûdunda ihrâklar zuhûru Cebeci-başı Mehmed Saʿîd Ağa'nın ʿadem-i tekayyüd ü ihtimâmına ʿazv ü isnâd ve işbu Cumâdelâhıre evâsıtında mansıb-ı mezkûrdan ʿazl ü ibʿâd ve Baş Kethudâ bulunan Mehmed Ağa Cebeci-başılık ile dil-şâd kılınup, bu sebeble ocağlarında silsile vâkiʿ ve herkes hisse-i ocağdan hazz u nasîbini alarak, hâyiz-i re’sü'l-mâl-i menâfiʿ oldu.