Şerîf Paşa'nın Ahısha'ya duhûlü ne vechile sûret-yâb olduğu mahallinde tafsîl u itnâb olunmuşidi. Müşârun ileyhin tavr-ı bâgiyâne ile sebkat eden hareket-i rediyyesi hazm olunur mevâddan olmadığına binâ'en, sûret-i tedmîri zihn-i Sadâret-penâhî'de dâ'imâ cilve-ger ve bir zûr-mend şahsı üzerine teslît ile hakkında icrây-ı siyâset muzmerr olmuşidi. Acâra Mütesellimi Hamşî-zâde Selîm Bey'de tâb u kuvvet maʿlûm ve bu emrin 'udesinden geleceği emr-i meczûm olduğuna binâ’en, etrâfından istimdâd ile kesb-i istiʿdâd ve Ahısha halkını dahi irâde-i Pâdişâhî'den haberdâr edüp, müşârun ileyhin istîsâline muvaffak olduğu hâlde, Çıldır Eyâleti'yle süllem-i refîʿ-i Vezâret'e isʿâd olunacağı sırran tarafına îrâd olunmuşidi. Mûmâ ileyh dahi tertîb-i ühbe-i peykâr ve cemʿ-i asker-i bî-şümâr edüp, Ahısha'ya teveccüh ü ikbâl ve Şerîf Paşa vâkıf-ı hâl olarak, Ahısha halkının iʿânetinden me'yûs ve Revân cânibine tahrîk-i râyet-i menkûs eylediği, mûmâ ileyh tarafından Âsitâne-i râstân'a 'arz u inhâ ve hakkında sebkat eden vaʿd-i cemîl îfâ kılınup, Çıldır Eyâleti Rebîʿulâhır'ın yirmi altıncı günü Rütbe-i Vezâret'le tarafına ihsân ve zabt-ı memleket ve hirâset-i ehl-i raʿiyyet eylemesi emr ü fermân kılınmışidi. Firârî-yi mezkûr Revân Hânı'na ilticâ etmiş bulunduğundan, 'afvını şâmil tahrîrât irsâliyle Hân-ı mezkûr müteşebbis-i dâmen-i Sadru's-sudûr olup, 'afvında harec ü mazarrat derkâr olduğundan, leyte ve leʿalle ile imrâr-ı eyyâm ve bu sûreti Revân Hânı ihsâs ile ser-i pîş-endâz-ı efkâr u evhâm olup, âhırü'l-emr hânân-ı İran'dan birini bir mikdâr asker ile Şerîf Paşa'ya terfîk ve cebren Ahısha'yı zabt etmek [Ü4 214b – V 85b] üzere Ahılkelek'e doğru geldiklerini Vâlî-yi cedîd tahkīk edüp, fi'l-hâl tertîb-i ʿudde vü ʿatâd ve etrâfdan cemʿ-i ecnâd edüp, etrâf u eknâfa taʿbiye vü teşhîn ve bir uğurdan üzerine hücûm ile haddini taʿyîn etmek kasdında olduğu, Şerîf Paşa'ya ʿilme'l-yakīn maʿlûm olup, mukāvemete ʿadem-i iktidâr ile geldiği semte firâr ve maʿiyyetinde bulunanların bir fırkası hılâl-i tarîkde baʿzı kurâya tesallut ile bilâ-tehâşî, sevk-ı devâbb ü mevâşî eyledikleri ihbâr olundukda, Selîm Paşa tarafından yolları katʿ olunup, ekseri tedmîr ü ifnâ ve irsâl eylediği on beş kadar re’s-i maktûʿ Serây meydânına ilkā olunup, müşârun ileyhin zabt u memleket ü enhâ ve defʿ-i mazarrat-ı erbâb-ı şekāda zuhûra gelen ikdâm ü gayreti, sebeb-i meziyyet-i kadr ü ʿizzeti olup, taraf-ı vâzıhu'ş-şeref-i hazret-i Sadâret-penâhî'den tahsîni şâmil müşârun ileyhe kā'ime tahrîr ve meşâmm-ı hamiyyeti nükhet-i teveccüh-i veliyy-i devlet ile taʿtîr olundu. Firârî-yi merkūmun müddet-i medîd o havâlî halkı ile ülfet ü istînâsı ber-mezîd olmuş bulunduğundan, bu bâbda kendüye hem-dest ü nasîr ve asker imdâdıyla yâver ü dest-gîr olmak zuʿm-ı bâtılına düşüp, etrâfa neşr-i evrâk ve her şahıs muʿînine izhâr-ı hubb u iştiyâk edüp, magzûb-i Pâdişâhî olduğuna binâ'en, merâmına müsâʿadeden herkes ibâ ve cânib-dârî-yi Vâlî-yi cedîd olarak, hukūk-ı sâbite-i devleti istîfâ eylediler.