Müşârun ileyhin Bozcaada maskat-ı re'si olup, resîde-i sinn-i şebâb oldukda, Cezayirli Vezîr Hasan Paşa'ya intisâb ve giderek Silahdârlık hıdmetini iktisâb etmişidi. Müşârun ileyhin İsmâʿîl Serʿaskerliği'nde Kapucu-başı ve Sadâret'i evânında Sipâh Ağası olup, Yûsuf Paşa Sadâreti'nde mesbût-ı cerîde-i vüzerây-ı ʿizâm ve mansıbı olan Eğriboz'a vusûlünde Atina'da vâkiʿ olan zulm ü ʿudvânı müşârun ileyhi mazhar-ı gazab-ı Şehriyâr-ı Behrâm-intikām edüp, iʿdâmı irâde olunmuşiken müsteşʿiren firâr ve terk-i kâr ü bâr ve hıdmetinde olan Arnabud bölük-başılarından birinin hânesinde ihtifâ ve bir müddet murûrunda hatî'ât-ı sâbıkasından igmâz olunup, 'unvân-ı Vezâret'i ibkā olunmuşidi. Sefer hıtâmında kemâ fi'l-evvel kayd-ı Vezâret'i ilgā ve beş yüz guruş meʿâş ile Gelibolu'ya iclâ olunup, umûr-ı memlekete müdâhale ve vücûh-ı nâs ile muʿâraza vü mücâdele üzere olduğu, ehâlî [Ü4 213a – V 84a] tarafından ihbâr ve Tekfürdağı'nda ikāmeti bâbında fermân-ı âlî ısdâr olunup, dağlu eşkıyâsının Kırkkilisa'ya vürûdlarında ehâlîye imdâd zemîninde bilâ-istîzân o tarafa revân olup, dâyiretü's-sev’-i eşkıyâya tekarrüb ve tabîʿatında merkûz olan sû’-i niyyet tezebzüb edüp, eşkıyâ ile safka-zen-i ittihâd ve bâʿis-i tekavvî-yi erbâb-ı zulm ü ʿinâd olup, fukarâ vü zuʿafâyı tâlân ve niçe hânedânı pâ-zede-i zarar u husrân eyleyüp, bilâhare sâbıkā Rumeli Vâlîsi Vezîr Tebedelenli ʿAli Paşa vâsıtasıyla cürmü ʿafv olunup, İnebahtı Sancağı ile Vezâret'i ibkā vü takrîr ve bir müddet-i kalîleden sonra Karahisâr-ı sâhib Sancağı'yla siyâh-hâne-i emeli tenvîr kılınmışidi. Müşârun ileyhin Devlet-i ʿaliyye'ye olan isâ'eti ferâmûş olunur keyfiyyâtdan olmadığına binâ'en, tertîb-i cezâsı kulûb-ı evliyây-ı umûrda matvî ve her sâʿat ü ân iʿdâm u izâlesi menvî ise dahi, maslahata mübâşeret, kurb ü civârında mütemekkin Gürcü ʿOsmân Paşa'ya sebeb-i vahşet olacağı zâhir olduğundan, müşârun ileyh Anadolu'dan ʿazl ve Erzurum'a ʿazîmet etdikden sonra, Karahisar Aʿyânı Monla-oğlu'na emr-i ʿâlî ısdâr ve sühûletle istîsâli işʿâr olunmuşidi. Merkūm, emr-i Pâdişâhî'yi icrâda berzede-dâmen-i ihtimâm olduysa dahi, sâyir vüzerây-ı ʿizâm bu mâdde ile kendüyi ithâm edeceğini inhâ ve bir Mübâşir irsâlini istidʿâ etmekle, âhar mâddeye me'mûr olmuş sûretinde zuʿamâdan biri taʿyîn ve mâdde hufyeten kendüye tebyîn olunup, Karahisar'a vardıkda, Monla-zâde'yi keyfiyyetden âgâh ve ol dahi rûz-şeb [Ü4 213b – V 84b] sayd-ı tezerv-i rûhiyçün nasb-ı dâm-gâh edüp, hâric-i serâyında vâkiʿ haremine vakt-i şâm ʿazîmet eder iken, der-kemîn olanlar her tarafdan üzerine kurşun atup, işbu Cumâdelûlâ evâyilinde kârını itmâm ve nâmını sahîfe-i ʿâlemden iʿdâm ve ser-i maktûʿu Âsitâne'ye getürilüp, siyâset-gâh-ı enâma vazʿ ile terhîb-i kulûb-ı mezâlim-pîşegân-ı eyyâm kılındı. Müşârun ileyh tenû-mend ü cesîm, sâhib-i heykel-i ʿazîm, zâlim ü gaşûm, müstelezzât-ı nefsâniyyeye harîs u menhûm, leyl ü nehâr hemm ü kasdı nehb ü gāret ve fikr ü zikri icrây-ı fesâd u mel'anet idi. Monla-oğlu'na bu hıdmet mukābili Kapucu-başılık ihsân ve oğlu dahi Silahşörlük 'unvânıyla ferhân kılındı.