Rûznâmçe-i Evvel olan Râsih Efendi, işbu Cumâdelûlâ'nın on dördüncü günü hulûl-i ecel-i mevʿûduyla terk-i meşgale-i dünyâ ve ʿazm-i savb-ı ʿukbâ edüp, münhall olan mansıbı leyl ü nehâr tahrîr-i vekāyiʿ-i devlet ile tahsîl-i mübâhât u iftihâr eden Fakīr-i pür-taksîre tevcîh ü ihsân ve püf-kerde-i rûzgâr-ı zûrkâr olan çerâğ-ı emeli pertev-i cihân-efrûz-i mekârim-i Şâhâne ile dirahşân kılındı. Müteveffây-ı mûmâ ileyh Bâzergân-başı oğlu olup, sinn-i kühûliyyete resîde oldukda, âzmâyiş-i meşk-ı ʿirfân ve havsale-i istiʿdâdı kadr-i kesb-i hüner ü izʿân edüp, bir zemân Mektûbî Kalemi'ne müdâvemet ve seksan üç târîhlerinde Hâcelik [Ü4 211b – V 82b] Rütbesi'yle tahsîl-i sermâye-i rifʿat etmişidi. Ordu-yi hümâyûn seferde iken, Rikâb Kethudâlığı ile sâhib-i teʿayyün ü iştihâr ve Moskov seferi gāyetinde Büyük Elçilik ile nâmdâr olmuşidi. Umûr-ı sefâreti nîk ü bed ru'yet ve Âsitâne-i saʿâdet'e ʿavdet eyledikde, Defter Emâneti ile mübeccel ve bir müddet murûrunda Riyâset-i Küttâb hidmet-i refîʿasıyla nâyil-i kusvây-ı emel olup, mübtelâ olduğu ʿillet, kesb-i zemânet eylediğinden maʿzûl ve Büyük Rûznâme mansıbına menkūl olmuşidi. Bundan sonra Hubûbât Nezâreti ve Defter Emâneti gibi menâsıb-ı devlete tasarruf u tevellî ve kevkeb-i ikbâli gün-be-gün mütelâlî vü müsteʿalî olup, Mısr-ı Kāhire Seferi zuhûrunda Büyük Rûznâmeci iken mükerreren Re'îsülküttâb olup, bir müddetden sonra meʾzûnen Âsitâne-i saʿâdet'e gelüp Tevkīʿî ve tekrâr Defter Emîni iken, Firdevsî Efendi vefâtında tekrâr Rûznâmeci olup, târîh-i mezkûrda vefât ve rûznâmçe-i ʿömrü tayy-kerde-i dest-i Hâdimü'l-lezzât oldu. Müteveffây-ı mûmâ ileyh hüner ü meʿârifden sevâd-hânlık derecesine vâsıl ve fenn-i muhâverede kâmil, zîb ü zînete mâyil, çelebi-meşreb ve hüsnü'ş-şemâyil idi. Siniyy-i ʿömrü ʿakd-i sittîne mütenâhiz ve ʿalâ-rivâyetin o dereceyi mütecâviz idi.