Umûr-ı Hicâziyye'ye dâʾir bundan akdem hâne-i hazret-i Fetvâ-penâhî'de münʿakıd olan meclis-i meşveretde Şâm Vâlîsi Vezîr ʿAbdullah Paşa tarafından Medîne-i münevvere'ye mehmâ-emken zahîre ve asker ile tîz elden imdâd olunmak ve müşârun ileyhe Serʿaskerlik tevcîh olunup, mevsim-i haccdan mukaddem asker-i vâfî ve tedârük-i küllî ile Hicâz cânibine ʿazîmet eylemek mâddeleri karâr-gîr-i erbâb-ı reʾy ü tedbîr ve bu umûra teferruʿ eden mülâhazât u tedbîrâtın bir ân akdem Der-i devlet-masîr'e ʿarz u tahrîri bâbında ʿale't-teʿâkub tarafına hıtâben müteʿaddid evâmir-i ʿaliyye ısdâr u tesyîr olunmuşidi. Bu defʿa vürûd eden tahrîrâtında iki yüz yük beksemâd ve iki yüz mikdârı asker tertîb ve baʿzı aşâyirin zamân u kefâletiyle hüccâc, Mısır tarîkıyle Medîne-i münevvere'ye sevk u tesrîb edeceğini ve havâlî-yi Şâm'da mütevattın kabâyilin İbn-i Suʿûd'a meyl ü rükûnları meczûm ise dahi, Devlet-i ʿaliyye tarafından ceyş-i kesîr taʿyîn olunduğu hâlde kabâyil-i mezkûre mutâvaʿat u mürâfekat ile hasm-ı devlet [Ü4 210b – V 81b] olan Havâric ile ez-dil ü cân, iʿmâl-i seyf ü sinân eyleyecekleri teʿahhüdâtını zikr u beyân eylemiş. Medîne-i münevvere bir müddetden berü Havâric-i seyyiʾü'l-iʿtikād ile mahsûr ve inkıtâʿ-ı turuk-ı zehâyir ile ehâlîsi rûy-i refâhiyyetden mehcûr olup, ber-muktezây-ı hamiyyet-i diyânet müşârun ileyhden şimdiye dek küllî iʿânet ve seyr-i hareketine dâʾir lâzım gelan tedbîrât u tasarrufâtı tahrîr ü işâret, meʾmûl-i erkân-ı Saltanat iken, sâdece güftâr-ı bî-meʾâl ile redd-i cevâb ve sadra şifâ vermeyecek sûret-i garîbeyi irtikâb, kâr-femâyân-ı devleti şinâver-i bahr-i ʿamîk-ı iztirâb edüp, tahrîrât-ı mezkûre bi-ʿaynihâ hâk-i kadem-i Şâhâne'ye ʿarz u takdîm ve mefhûm-ı tahrîrâtdan istinbât olunan ahkâm ifâde vü tefhîm olundukda, müşârun ileyhin bu emr-i ʿazîmde zuhûr eden ʿadem-i mübâlâtı ve bu tarafdan ilkā vü inhâ olunan irâdât-ı seniyyeye ber-vech-i işbâʿ cevâb-nâme göndermemek keyfiyyâtı, bâʿis-i renciş-i tabʿ-ı hümâyûn ve sebeb-i cûşiş-i gayret-i Şehriyâr-ı rubʿ-meskûn olmağla, huzûr-ı lâmiʿu'n-nûr-ı Husrevâne'de bu hatb-ı cesîm müzâkere ve iktizây-ı hâl ne ise kuvvetden fiʿle îsâl olunmak irâde olunup, huzûrları matlûb olan efrâd-ı erkân-ı devletin isimleri tasrîh olunarak, hatt-ı hümâyûn dahi şeref-rîz-i sudûr olmuşidi. Binâ'en-ʿalâ-zâlik işbu Rebîʿulâhır evâsıtında Sadrıaʿzam ve Şeyhulislâm Efendi hazerâtı ve sâbıkā Sadr-ı Rûm ʿİsmet İbrâhîm Beyefendi ve Kethudâ Bey ve Defterdâr Efendi ve Re'îsülküttâb Efendi ve Îrâd-ı Cedîd Defterdârı huzûr-ı müstelzimü'l-hubûr-ı Şâhâne'ye duhûl şerefiyle nâyil-i eʿazz-i me'mûl [Ü4 211a – V 82a] oldukları hâlde, ʿAbdullah Paşa'nın bu emr-i hatîrde zâhir olan butûʿ u rehâvet ve ʿadem-i hamiyyet ü gayreti karâyin-i hâliyye ve delâyil-i ʿakliyye ile sâbit olup, leʿalle ve ʿasâ ile imrâr-ı subh u mesâ etmeyerek, bu emr-i ehemmin tesviye vü tanzîmi bir Vezîr-i sütûde-tedbîr ve bir müşîr-i gayret-semîrin süpürde-i ʿuhde-i diyâneti kılınmak huzzâr-ı meclise emr ü fermân olunup, fî-bâdiyyi'l-emr herkes ser-fürû-bürde-i zemîn-i efkâr ve bilâhare Vezîr Cezzâr Ahmed Paşa'nın o havâlîde olan sît ü iştihârı hasebiyle me'mûriyyeti tercîh-kerde-i huzzâr olduysa dahi, müşârun ileyhe ber-vech-i istimzâc bundan akdem bu mâddeye dâ'ir hatt-ı hümâyûn ısdâr ve mahsûs Hasekî ihrâc olunmuş olmağla, haberi gelinceye dek me'mûriyyetinin birkaç gün te'hîri istisvâb ve bu vechile katʿ-ı rişte-i su'âl ü cevâb kılınup, huzzâr-ı meclis ʿavd ü iyâba ruhsat-yâb oldular.